afcasiancup.com: Улар қандай чиқишди? Ўзбекистон

Маълумот учун:
Ўзбекистон миллий терма жамоаси
Қитъа чемпионатларидаги иштироки: 5 (1996, 2000, 2004, 2007, 2011)
Энг яхши кўрсаткич: 4-ўрин (2011)
Ўйинлари сони: 20 (9 ғалаба, 3 дуранг, 8 мағлубият)

Ўзбекистон терма жамоаси шу пайтгача беш марта Осиё Кубогида қатнашган бўлиб, энг яхши кўрсаткичга 2011 йил Қатарда ўтказилган мусобақада эришган. Ўшанда жамоа учинчи ўрин учун кечган беллашувда Жанубий Кореяга 2:3 ҳисобида мағлуб бўлиб, якунда тўртинчи ўрин билан кифояланганди.

Орадан вақт ўтиб навбатдаги қитъа биринчилиги саралаш босқичини ижобий ўтказган Ўзбекистон термаси яна Осиё чемпионатига йўл олди. Саралашдаги дастлабки баҳсни ўз майдонида Гонконгга қарши ўтказган жамоа 0:0 ўйнади. Кейин эса сафарда БАА билан кечган баҳсда 1:2 ҳисобида имконият бой берилди. Ўйинда ўзбекистонликлардан Шоҳрух Гадоев гол урганди.

Кейинги учрашувларга келиб Ўзбекистон ғалаба нашидасини сурди: Вьетнам 3:1 ҳисобида доғда қолдирилди. Сардор Рашидов билан Игорь Сергеев биттадан тўп киритган бўлса, яна бир голни вьетнамликлар ҳимоячиси ўз дарвозасига киритиб қўйди. Жавоб беллашувида эса 3:0 ҳисоби қайд этилди. Яна Рашидов билан Сергеев, шунингдек Воҳид Шодиев ўзини кўрсатди.

Ундан кейинги беллашув Гонконг билан ўтказилди ва бунда 2:0 ҳисобидаги ғалаба қўлга киритилди. Бу учрашувда Воҳид Шодиев билан Одил Аҳмедов гол муаллифлари бўлишди.

Ниҳоят гуруҳдаги охирги ўйинни ўз майдонида БААга қарши ўтказган Ўзбекистон 1:1 ҳисобида дуранг қайд этди. Игорь Сергеев томонидан киритилган гол ўзбекларга кетма-кет олтинчи марта Осиё чемпионатида қатнашиш эшигини очди.

Жамоа Австралиядаги қитъа биринчилигида "В" гуруҳида Саудия Арабистони, Хитой ва КХДРга қарши баҳс олиб боради.