Адебайор Роналду ва Месси ҳақида: "Лео – энг буюклардан бири, лекин ҳатто гўримда ҳам Криштиануни танлайман"

– Сиз билан ўйнаган футболчилар орасида Роналдуни энг яхши сифатида танлайсиз, деб ўйлайман. У камида голлар бўйича устун.

– Албатта. Фақат голлар бўйича эмас, балки характери бўйича ҳам. У ҳеч қачон таслим бўлмайди. Сиз уни жароҳат олган, чарчаган деб ўйлайсиз, лекин у майдонга чиқиб хет-трик қилади ёки тўртта гол уради. Унинг Саудия лигасида ҳам гол ураётгани мен учун ажабланарли эмас, чунки айнан у шу нарса учун яшайди.

– Демак, сиз Мессини эмас, Роналдуни танлайсиз.

– Бу яхши савол, ростини айтаман. Роналдуни танлайман. Месси футбол тарихидаги энг буюклардан бири. Мен "Реал"да унга қарши тўп тепганман.

Мен Роналдуни танлайман, чунки у билан машғулот қилганман, у билан бирга ўйнаганман, у нима қила олишини биламан. Албатта, Мессининг ўйинларда нима қила олишини кўрганман, лекин унинг машғулотларда нима қила олишини билмайман. Шунинг учун Роналдуни танлайман.

Мен учун Роналду – ажойиб, фантастик футболчи. Агар сиз Роналду ва Месси орасидан танлашни сўрасангиз, мен ҳатто гўримда ҳам Роналдуни танлайман, чунки у билан ўйнаганман ва унинг қанчалик кучли эканини биламан. Лекин Месси, шубҳасиз, энг буюклардан бири.

Мен одамлар нега уларни таққослашга уринганини тушунмайман. Улар таққосланиши шарт эмас, уларни ўз оламларида қолдириш керак", – деди "Арсенал", "Манчестер Сити" ва "Реал" собиқ ҳужумчиси.