Абинур Нуримбет: "Андижон" билан мавсумни юқори ўринларда тугатишимиз керак. Ҳусановнинг нималарга қодирлигини биламан"

Қозоғистон терма жамоаси аъзоси "бургутлар"нинг Тошкентдаги машғулотларида иштирок этмоқда. Тўп тепар янги жамоасидаги дастлабки таассуротлари билан ўртоқлашди. 

"Агентлар менга "Андижон" вариантини таклиф қилишди. Ўйлаб кўрдим ва розилик бердим. "Гомел"да бироз омадсиз мавсум ўтказгандим. Бу ерда мени яхши қарши олишди ва тезроқ мослашишимга ёрдам беришяпти. Ички муҳит ҳам ажойиб. 

Ўз кучимни Ўзбекистон чемпионатида синаб кўриш истаги туғилди. Суперлигада рақобат юқори. Мен эса таркибда ўз ўрнимга эга бўлиш учун кўпроқ меҳнат қилишимни сезиб турибман. Бу орқали жамоага ёрдам беришни мақсад қилганман. "Андижон" билан мавсумни юқори ўринларда тугатишимиз керак. Жамоанинг жонкуяр мухлислари бор. Менга ижтимоий тармоқларда видеоларини ташлашган. Бундай муҳитда тўп тепиш ажойиб бўлиши аниқ. 

Абдуқодир Ҳусанов билан танишман. Унинг нималарга қодирлигидан хабарим бор. Менга ҳам унинг йўлини беришини сўраб қоламан. Олимпиадада Ўзбекистон яхши иштирок этади деб ўйлайман",- дейди Абинур Нуримбет