Абдумавлон Абдужалилов: "Футболдан ташқарида бўлаётган ишларга жиддий қараш футболчиларнинг вазифаси эмас"

- Бугунги ўйин қандай таассурот қолдирди?

- Кам сонли имкониятлар яратдик ва улардан фойдалана олмадик. Лекин иккинчи бўлимдаги ўйинимиз эвазига ғалаба қозонишимиз мумкин эди. Балки ўйин даражасида сифат етишмагандир. Бунга очиқ ўйин намойиш этганимиз сабаб бўлиши мумкин. Гол ўтказиб юборишимизга ҳам сифатли ҳимоялана олмаганимиз таъсир қилди. 

- "Бунёдкор" мавсумни яхши бошлаганди. Бироқ сўнгги ўйинлардаги натижалар клуб мухлисларини хафа қилмоқда. Бунга сабаб нимада?

- Биласизми, бунинг сабабини ўзимиз ҳам қидиряпмиз. Бу ҳам бир тажриба. Ҳозир шундай даврни бошдан кечиряпмизки, ғалаба қозониш қийин бўляпти. Кўп мағлубиятга учраганмиз йўқ, шунчаки ғалаба қозониш қийин бўляпти, яъни дурангларимиз сони кўпайиб кетди. Бунинг сабабини қидиришда давом этамиз. Хурсанд қилаётган бир жиҳати, ҳар доим бир жамоа бўлиб ҳаракат қиляпмиз. Ҳар ўйинда кимдир хато қилиши мумкин, аммо хатолар – футболнинг бир бўлаги. 

- Бундай натижаларга жамоадаги ички муҳит ҳам таъсир ўтказмайдими? Яқинда клуб спорт директори Ислом Иномов ишдан кетди. Шунингдек, раҳбарият ва мураббий ўзгариши мумкинлиги ҳақида гап-сўзлар мавжуд.

- Ҳа, ўйиндан аввал шундай гап-сўзлар ҳақида эшитдик. Балки ташқаридан кимдир таъсир ўтказмоқчидир. Жамоа аъзоси сифатида шу нарсага 100 фоиз аминманки, мураббийлар штаби ва футболчилар – бир жамоамиз. Шунақа пайтда бирлашмасак, ғалаба қозониш янада қийинлашади. Балки бу таъсир қилаётгандир. Лекин футболдан ташқарида бўлаётган ишларга жиддий қараш футболчиларнинг вазифаси эмас. Биз футбол ўйнашимиз, ўз ўйинимизни кучайтиришимиз керак. Шундагина жамоага ёрдам берган бўламиз. Чунки бундай ҳолатлар кўп жамоаларда учраб туради. Бундай воқеа-ҳодисаларга чалғисак, ўз ишимизни эсдан чиқариб қўйишимиз мумкин.