Абдулла Абдуллаев: “Бўш трибуналар қаршисида тўп тепиш осон бўлмади”

Беллашувни тўлиқ ўз назоратида ўтказган “қалдирғочлар” кичик 1:0 ҳисобида ғалабани қўлга киритди ва муҳим уч очкога эга чиқди. Учрашувдан сўнг эса захирадан майдонга тушган ярим ҳимоячи Абдулла Абдуллаевнинг фикр ва мулоҳазалари билан қизиқдик.

“Қалбан бизни қўллаб- қувватлаб турган мухлисларимизни ғалаба билан табриклайман. Анча вақтдан кейин ўтказилган биринчи расмий ўйин учун ҳаракатларимиз чакки чиқмади деб ўйлайман. Бу ҳали ҳаммаси эмас. Ўйиндан ўйинга кучайиб борамиз ва ўзимизнинг энг яхши учрашувларимизни кўрсатишга ҳаракат қиламиз.

Албатта, бўш трибуналар қаршисида тўп тепиш осон бўлмади. Аммо, кўникиб боришга мажбурмиз. Муҳими устунлик ва тўп назорати биз томонда бўлди. Ҳақли равишда ғалабага эришдик. “Қўқон-1912” ҳам жиддий қаршилик кўрсатди. Сўнги дақиқалар яқинлашгани сари босимни оширдик. Рестартдаги ғалаба жамоамизнинг кайфиятига ижобий таъсир қилиши аниқ. Тўғри, голга тортадиган вазиятлар яратдик. Тезкор гол уриб ҳисобни очишимиз ҳам мумкин эди. Жарима зарбасидан кейин тўп дарвоза устунига тегди. Кўпроқ тўп киритиб ҳисобни йирик кўринишга келтиришга уриндик. Асосийси уч очкони ўзимизники қилдик”,- дейди Абдулла Абдуллаев.