Абдужамол Исроилов: "Яна икки ойдан сўнг футбол ўйнашим мумкин экан"

Бугун биз Абдужамол Исроилов билан боғланиб, жароҳати борасида суҳбатлашдик.

Авваламбор, мени қўллаб-қувватлат турган мухлисларга миннатдорчилик билдираман - дейди Абдужамол Исроилов. Жароҳат олганимдан сўнг жуда кўп мухлислар қўнғироқ қилиб, хол-аҳвол сўрашди, айримлари келиб кўриб кетишмоқда. Ҳозирги кунда аҳволим яхши, олган жароҳатим туфайли ўтказилган жарроҳлик операцияси муваффақиятли якунланди. Насиб қилса яқин орада тикланиш машғулотларига киришаман. Шифокорларнинг маълум қилишича, яна икки ойдан сўнг футбол ўйнашим мумкин экан.

Ўз навбатида яратиб берилаётган шароит учун "Навбаҳор" футбол клубига раҳмат айтаман. Айни вақтда футбол ўйнай олмаётган бўлсам ҳам, жамоадошларимни қўллаб-қувватлаб турибман. Насиб қилса, майдонга янада кучлироқ бўлиб қайтаман. "Андижон" жамоасига қарши кечадиган учрашувда "Навбаҳор"га омад тилайман, водий дербиси жуда қизиқарли ўтиши аниқ.

Бекзод Толибов ёзиб олди.