А Серия. Турнинг марказий учрашуви яна Римда бўлади
19 сен 2017 17:52
Новости
![](https://championat.asia/upload/storage/278659_original.jpg)
![](/upload/storage/278659_220.jpg)
А Серия. Турнинг марказий учрашуви яна Римда бўлади
Ўтган турда Италия А Сериясида пешқадамлар очко йўқотишмади. "Интер" "Кротоне"ни сўнгги дақиқаларда мағлуб этди. "Наполи" дебютант "Беневенто"га умуман имконият қолдирмади. "Ювентус" эса "Сассуоло"дан сафарда устун келди. Дибаланинг бенефисига айланган баҳсда аргентиналик ҳужумчи навбатдаги хет-тригини нишонлади.
Шу тариқа "Ювентус", "Интер" ҳамда "Наполи" жамоалари турнир жадвалида пешқадамлик қилишда давом этишмоқда.
"Лацио" эса осон бўлмаган сафардан ўзи керакли 3 очко билан қайтди. Чиро Иммобиле ўзининг ажойиб ўйинлари ва голлари билан яна жамоаси жонига оро кирди.
Мағлубият аламини татиб кўрмаган жамоалар тўқнашуви - "Торино" - "Сампдория" учрашуви голларга бой тарзда ўтди. Аммо бу беллашувда ғолиб аниқланмади. Яъни, жамоалар мағлубиятсиз серияларини давом эттиришди.
Римдаги "тарсаки"дан кейин ўзига келган "Милан"га эса бу сафар "Удинезе" устидан Никола Калиничнинг дубли муҳим ғалабани келтирди.
"Рома" ўз уйида "Верона" билан ортиқча муаммоларга дуч келмади. Эйсебио ди Франческо жамоаси йирик ғалабани қўлга киритди.
А Серия, 4-тур. Турнир жадвали
16 сентябрь, шанба."Кротоне" - "Интер" 0:2
"Фиорентина" - "Болонья" 2:1
"Рома" - "Верона" 3:0
17 сентябрь, якшанба.
"Сассуоло" - "Ювентус" 1:3
"Милан" - "Удинезе" 2:1
"Наполи" - "Беневенто" 6:0
"СПАЛ 2013" - "Кальяри" 0:2
"Торино" - "Сампдория" 2:2
"Кьево" - "Аталанта" 1:1
"Женоа" - "Лацио" 2:3
Ўтказилган 10 учрашувдан тўрттасида мезбонлар, яна шунчасида меҳмонлар ғалаба қозонишди ва қолган иккита баҳсда дуранг қайд этилди.
Бу турда жами 34та гол киритилди. Буларнинг 19тасини мезбон жамоалар уришган бўлса, меҳмонлар 15таси меҳмонлар ҳисобига ёзилди.
А Серияда "Ювентус" ҳужумчиси Пауло Дибала 8та гол билан тўпурарлар баҳсида пешқадамликни ўз қўлига олган. Дибала жорий мавсумда майдонни голсиз тарк этмаяпти. Иккита ўйинда хет-трик қайд этган аргентиналик футболчи, қолган иккита учрашувда биттадан гол киритишга муваффақ бўлди.
Энг яхши ассистент эса "Наполи" аъзоси Лоренцо Инсинье бўлиб турибди. Ушбу футболчи жамоадошларининг 4та голига ҳаммуаллифлик қилган.
А Серия 4-турининг рамзий терма жамоаси (4-3-3):
Дарвозабон: Алессио Краньо ("Кальяри")
Ҳимоячилар: Давиде Калабрия ("Милан"), Милан Скриньяр ("Интер"), Кулибали ("Наполи"), Гулям ("Наполи")
Ярим ҳимоячилар: Ража Наинголан ("Рома"), Адам Ляйич ("Торино"), Федерико Кьеза ("Фиорентина")
Ҳужумчилар: Пауло Дибала ("Ювентус"), Дрис Мертенс ("Наполи"), Никола Калинич ("Милан")
5-турни очиб берадиган ўйин "Болонья" ҳамда "Интер" ўртасида кечади. Кетма-кет иккита турдан буён иши юришмаётган "Болонья" ўз уйида пешқадамлар сафида кетаётган "Интер"ни меҳмон қилади.
Ушбу жамоалар ўртасидаги беллашувларда "Болонья" жамоаси сўнгги бор 2013 йилда "Интер"ни мағлубиятга учратган. Бугун ўша нохуш сериясига чек қўйиш мақсадида майдонга тушадиган мезбонларга осон бўлмаслиги аниқ.
Эртага эса турнинг қолган тўққизта учрашуви бўлиб ўтади.
Туринда "Ювентус" ўзининг принципиаль рақибларидан бири "Фиорентина"ни қабул қилади. Стефано Пиоли Аллегрига тактик кураш таклиф этадиган баҳсда "Фиорентина"нинг имкониятлари қандай? "Ювентус"га А Серияда ҳозирча фақат "Женоа" жиддий қаршилик кўрсатиб кўрди. Қолган ўйинларда Аллегри жамоаси ортиқча қийинчиликсиз ўйнамоқда. Бу турда эса жамоа яна қийналиши мумкин.
"Милан" эса яна уйида ўйин ўтказади. Бу сафарги рақиб Монтелла жамоасини кўп ҳам терлатиб қўймаслиги мумкин. Узоқ танаффусдан сўнг А Серияга қайтган "СПАЛ 2013" ҳозирча чемпионатга тўлиқ мослашиб улгургани йўқ. Шу боисдан бу тўқнашувда фаворит аниқ.
"Рома" ҳам осон сафарга йўл олмоқда. А Серия дебютантига қарши ўйинда "Рома"га фақатгина ўзлари ҳалақит бериб қолишлари мумкин. Яъни рақибни менсимаслик оқибати "Рома"га қимматга тушиши мумкин.
Турнинг марказий ўйини шубҳасиз Римда бўлади. Чиро Иммобиле билан чақнаётган "Лацио" Дрис Мертенси бор "Наполи"ни қабул қилади. Симоне Инзаги энди Римда Маурицио Саррига меҳмондорчилик уюштириб беради. "Наполи" "Милан" Римда қандай аҳволга тушганини яхши билади. Шу боисдан ҳам Сарри буёғига рақибга қараб тактика ишлаб чиқиши керак. Чунки "Лацио" ўз уйида ҳар қандай жамоани эсанкиратиб қўйиши мумкинлигини амалда кўп исботламоқда. "Наполи" эса анча "пишган" ва жиддий чорловларга кўниккан тажрибали жамоага айланиб улгурган. Ушбу қарама-қаршилик шубҳасиз турни безагига айланади.
А Серия, 5-тур. Турнир жадвали
19 сентябрь, сешанба.
"Болонья" - "Интер" (23:45)
20 сентябрь, чоршанба.
"Беневенто" - "Рома" (21:00)
"Милан" - "СПАЛ 2013" (23:45)
"Лацио" - "Наполи" (23:45)
"Ювентус" - "Фиорентина" (23:45)
"Верона" - "Сампдория" (23:45)
"Женоа" - "Кьево" (23:45)
"Кальяри" - "Сассуоло" (23:45)
"Аталанта" - "Кротоне" (23:45)
"Удинезе" - "Торино" (23:45)
Похожие новости
![AMP Logo](https://championat.asia/image/logo-amp.png)
Комментарии