2024 йил ёзининг энг қиммат ТОП-10 трансфери. Мавсум улар учун қандай ўтди?

Бугунги даврда жаҳон футболида жуда катта суммалар айланмоқда ва клублар ақл бовар қилмас нархларга у ёки бу ўйинчини сотиб олишга тортиниб ўтиришмаяпти. Ўтган ёзнинг энг қиммат трансферлари соҳиблари учун мавсум қандай кечганига бир назар ташласак, нима дейсиз? Катта умид билан, унданда катта пулларга олиб келинган футболчилар ишончни оқлашдими ёки йўқ, ушбу саволнинг жавоби сизга қизиқми? Унда кетдик.

10. Майкл Олисе

2023 йил Олисе "Челси"га кўчиб ўтиши кутилганди, лекин якунда "Бавария" уни "Кристал Пэлас"дан 53 млн евро эвазига сотиб олди. Венсан Компани жамоаси ўнг қанотидан жой эгаллаган Олисе Бундеслигада ҳам, Чемпионлар Лигасида ҳам ўз маҳоратини намойиш қила олди. Барча мусобақаларни қўшиб ҳисоблаганда у 17 та гол урди ва 21 голли узатма етказиб берди. Франциялик Мюнхендаги янги босқични яхши бошлай олди ва ишончни оқлади десак, муболаға бўлмас. 

9. Дани Ольмо

"Ла Масия"да футболдаги дастлабки қадамларини қўйган Ольмо клубдан кетиб, кейинроқ "Барселона" афсусланишига сабабчи бўлди. Аввалига Загребнинг "Динамо"сига, кейин эса "РБ Лейпциг". Испания сафида Евро-2024даги ғалабадан кейин "Барселона" ярим ҳимоячини уйга қайтариш учун 55 млн евро сарфлашга рози бўлди. Ольмо қайд этишдаги муаммолар туфайли маълум вақт дебют қила олмади, унинг Ла Лигадаги 10 голи ва 4 та узатмаси "Барселона"га "Реал"дан устун келишида маълум даражада ёрдам берди, Чемпионлар Лигасида ҳам у ўзини яхши томондан кўрсата олди.

8. Тейн Копмейнерс

2024 йилнинг март ойида Копмейнерс "Аталанта"дан кетмоқчилигини очиқчасига ОАВда айтди. Нидерландия терма жамоаси ярим ҳимоячисини аввалига "Ливерпуль" сафида кўришни тахмин қилишганди, сифатли даражадаги уч мавсумдан кейин А Серия юлдузига айланган ва жамоасига Европа Лигаси бош совринини қўлга киритишда катта ёрдам берган Копмейнерс узоқ музокаралардан кейин "Ювентус"га ўтди. 

Туринликлар футболчи учун 58,4 млн евро тўлаб берди. 27 ёшли футболчи ўтган мавсум "Ювентус" ярим ҳимоясининг муҳим қўрғони бўлди ва мавсум давомида 44 учрашувда майдонга тушди. Бироқ мавсум жамоа учун омадсиз ўтди. "Аталанта"даги охирги мавсумида 15 та гол урган Копмейнерс 5 та тўп билан кифояланишга мажбур бўлди. Футболчи ҳам, клуб ҳам янги мавсумда баъзи жиҳатлар устида ишлаши кераклигини яхши билади.

7. Амаду Онана

Онанани "Манчестер Юнайтед" ўз таркибида кўришни истаганди, лекин ўтган ёз Амаду "Астон Вилла"дан 59,35 млн евро эвазига "Эвертон"га ўтди. 23 ёшли жисмонан бақувват футболчи Унаи Эмери услубига мос фигура эди, аммо "Вилла Парк"да ўз салоҳиятини тўлиқлигича очишга ҳозирча муваффақ бўлмагандек.

6. Жоау Невеш

Клуб фалсафасини ўзгартиришга қарор қилган ПСЖ – мегаюлдузларни сотиб, жамоа тузди. Бироқ буни ҳозир, орадан деярли бир йил ўтиб, факт сифатида айта оламиз. Бир йил аввал парижликлар Чемпионлар Лигасини ютади деса, Франция гегемони мухлислари ҳам ишонч билан бу фикрни тасдиқлай олмасди. Қизиғи, "Бенфика"дан ўтган ёз сотиб олинган Невеш асосий вазифа муваффақиятли бажарилишида муҳим роль ўйнади. Невеш ПСЖ билан Клублар ўртасидаги ЖЧ бош совринидан бошқа барча мусобақаларда зафар қучди, Португалия билан Миллатлар Лигаси кубогини қўлга киритди. Ҳали анча ёш бўлган Невеш фаолиятидаги энг яхши мавсум ва бундан кейин ҳам уни такрорлаш қийин бўлади. "У жамоамиз учун идеал мос футболчи: унинг ўйин услуби, жисмоний кучи, интеллекти, жамоадошлари билан мулоқотда ўзини тутиши, барчаси мос келди. Унинг битта муҳим жиҳати бор: у тўпни ҳеч қачон йўқотмайди", — деди мураббий Луис Энрике ўтган йил сентябрь ойида. Ўшанда бу фикрга кулиб қўйганлар, орадан бир йил ўтиб, испаниялик қанчалар ҳақ бўлганини ўзлари тушуниб олишди.

5. Мусса Диаби

Диабининг Саудия Арабистонининг "Ал Иттиҳод" клуби сафига 60 миллион евро эвазига трансфер қилиниши, "Астон Вилла" деярли шу пул эвазига Онанани ўз сотиб олиши учун имконият берди. Ҳужумкор футболчи 25 ёшида Премьер-Лигани тарк этишга қарор қилгани билан кўпчиликни ҳайрон қолдирди. Ўтган мавсум Саудия Арабистони чемпионатида у 5 та гол урди ва 15 та голли узатма етказиб берди. Маълум даражада айнан унинг самарадорлиги эвазига клуб ўз тарихида 10-чемпион титулини қўлга киритди. Қўшимчасига, Мусса у ерда ишлаб топадиган пулларини инобатга олсак, набираларига ҳам етиб ортади.

4. Педру Нету

Ўтган йил ёзида "Челси" Нету учун "пойгада" ҳаммадан ўзиб кетди ва "Вулверхэмптон"га 60 миллион евро тўлади. Янги жамоада Нету учун таркибга кириш учун кураш осон бўлмади. Ўзи ҳаракат қилиши мумкин бўлган нуқтадаги ўнлаб футболчилар билан курашни дунёнинг бошқа ҳеч қайси клубида у учратмасди. Албатта, бу ҳазил... Аммо ҳар бир ҳазилнинг замирида қанчадир ҳақиқат бўлади дейишади-ку. Мана бу суратда яқинда ҳам "аристократлар" сафида тўп тепаётган ва ўйин вақти учун курашган ҳужумкор футболчилар рўйхати акс этган – уларнинг ўзидан битта алоҳида жамоа тузса бўлади-я.

Бироқ Нетунинг меҳнаткашлиги Энцо Маресканинг эътиборидан четда қолмади – футболчи "Челси"га Конференциялар Лигаси ва клублар ўртасидаги ЖЧда зафар қучишда катта ёрдам берди. 9 та гол ва яна шунча голли пас кўп эмас дейишга шошилмаган маъқул, чунки ҳозирги "Челси"да бундай кўрсаткичга эга футболчилар бармоқ билан санарли. Нима бўлган тақдирда ҳам Нету янги мавсумда уларни янада яхшилашга ҳаракат қилиши аниқ.

3. Лени Йоро

Йоронинг 62 миллион евролик трансфер нархи "Манчестер Юнайтед"га ўтиб улгурмасидан кўпчиликнинг эътиборини тортди ва баҳс-мунозараларга сабаб бўлди. Кимдир клубни танқид қилса, яна кимлардир, мисол учун Рио Фердинанд, уни "қизил иблислар" сафига ўтишга ундарди. 

"Юнайтед" Йорони бир қарашда "Реал" билан курашда ютиб олганди, аммо жароҳат сабаб ёш футболчининг дебюти бир неча ойга кечиктирилди. АПЛда 15-ўрин ва Европа Лигаси финалида мағлубият – мақтанадиган ҳеч нима ва мақтайдиган ҳеч ким йўқ, лекин Йоро ҳаракат қилди. Янги мавсум балки у учун катта клубдаги ҳал қилувчи мавсум бўлар.

2. Доминик Соланке
Cоланке "Тоттенхэм" учун рекорд харид ва Премьер-Лигада ўтган йил ёзги трансфер ойнасининг энг йирик келишувига айланди. Ўшанда у "Борнмут"дан 64,3 млн евро эвазига Лондонга кўчиб ўтганди. "Тоттенхэм" учун АПЛ ўтган мавсуми жуда омадсиз ва қийин ўтиб, якунда 17-поғона банд этилган бўлсада, Соланке унчалик ёмон кўринмади ҳамда Премьер-Лиганинг 27 та учрашувида ўз ҳисобига 9 гол ёздириб қўйди. Европа Лигасидаги унинг 5 та голи эса жамоа 2008 йилдан буён илк совринини қўлга киритиши учун замин яратди. Клубга бефарқ бўлмаганларнинг бу мавсум Томас Франк қўл остида Соланкедан умидлари катта.

1. Хулиан Альварес

Ўтган ёз Хосеп Гвардиола Альваресни "Атлетико"га қўйиб юборганида кўпчилик ҳайрон бўлганди, чунки форвард анча фойдали ҳаракат қилаётгандек туюларди. Аммо трансфер амалга ошди ва "Манчестер Сити" аргентиналик учун 75 миллион евро олди. Хулиан "Сити" таркибида 103 та ўйинда 36 та гол урди ва 17 та голли узатма етказиб берди. Гвардиола эса январда Хулианнинг ўрнини ёпиш учун Омар Мармушни олиб келди. Ўтган мавсум барча мусобақаларни инобатга олганда Альварес "Атлетико" сафида 29 та гол урди, лекин бирорта соврин юта олмади. Форвард кетиш ниятида эмас ва янги мавсумга умид билан қарамоқда.

Сиз қандай фикрдасиз, бу рўйхатга яна кимларни қўшса бўлади?