107 йиллик тарихга эга Истанбул дербиси олдидан превью

Нафақат турнинг, балки чемпионатнинг марказий учрашувларидан бири бугун ўтказилади. Унда Истанбул шаҳрининг икки клуби "Галатасарой" ва "Фенербахче" ўзаро тўқнаш келишади.

Дастлабки даврада "Фенербахче" майдонида ўтган баҳсда 1:1 ҳисоби қайд этилганди. "Шукру Саражоглу" стадионида бўлиб ўтган ўйинда мезбонлар вакили Диего ҳисобни очган бўлса "Галатасарой" бунга Олжан Адиннинг голи билан жавоб берганди - 1:1.

Айни пайтда "Фенербахче" 59 очко билан иккинчи, "Галатасарой" эса 39 очко билан бешинчи поғонада бормоқда. 

Ушбу клубларнинг тўқнашув тарихи 1909 йилга бориб тақалади. Ўша йилнинг 17 январида бу клублар илк бор ўзаро ўйин ўтказишганди. Ўртоқлик мақомида ўтган баҳсда "Галатасарой" 2:0 ҳисобида зафар қучганди.

Бугунги кунга қадар бу икки жамоа 381 марта тўқнаш келишган. Ундан 144тасида "Фенербахче" ғалаба қозонган. 122 бор "Галатасарой" зафар қучган. 115 марта жамоалар ғолибни аниқлай олишмаган. "Фенербахче" 529та гол урган, "Галатасарой" ҳисобида 481та гол бор.

Совринлар қўлга киритиш бўйича "Галатасарой" устун.

Мусобақа	Галатасарой	Фенербахче
Туркия чемпиони	20	19
Туркия Кубоги	16	6
Туркия Суперкубоги	14	9
Европа лигаси	1	0
УЕФА Суперкубоги	1	0
Жами	52	34

 

Дерби тарихида энг кўп томошабин 2003 йил 27 сентябрь куни "Галатасарой" мезбонлигида ўтган учрашувга келган. "Отатурк" стадионида 71334 нафар томошабин ушбу баҳсни томоша қилганди.

Ҳозирги кунда "Галатасарой"да голландиялик Ян Олде Рикеринк бош мураббий бўлиб ишламоқда. У Мустафо Денизлининг ўрнини эгаллаганди. Рикеринк клубда мавсум охиригача ишлайди холос. "Порту"даги фаолияти билан таниш бўлган португалиялик Витор Перейра 2015 йил ёзидан буён "Фенербахче"ни бошқариб келмоқда. 

Бугунги кунда "Галатасарой"да ўйнаётган таниқли футболчилар: Фернандо Муслера, Хоқон Болта, Орельен Шеджу, Сабри Сариоглу, Ҳамит Олтинтоп, Уэсли Снейдер, Умут Булут, Лукаш Подольски, Бурак Йилмаз.

Бугунги кунда "Фенербахче"да ўйнаётган таниқли футболчилар: Волкан Демирел, Симон Кьяер, Бруну Алвеш, Эркин Жанер, Меҳмет Топал, Соуза, Диего, Рауль Мейрелеш, Луиш Нани, Лазар Маркович, Робин Ван Перси.

Айни пайтда "Фенербахче" сафида ўйнаётган Жанер Эркин ва Меҳмет Топал ўз вақтида "Галатасарой" шарафини ҳимоя қилишган. Ўз навбатида "Галатасарой" сафида ҳам шундай футболчилар бор. Олжан Адин ва Билол Киса олдинроқ "Фенербахче" таркибида фаолият олиб боришган.

Эслатиб ўтамиз, "Галатасарой" - "Фенербахче" учрашуви бугун, Тошкент вақти билан соат 23:00да бошланади.