Zominga yangi bosh murabbiy tayinlandi

Futbolchilar kuniga ikki mahaldan shug'ullanmoqda. Jamoaga yangi bosh murabbiy tayinlandi. O'tgan yili Jizzax viloyatining boshqa bir jamoasi «G'allakor»ni boshqargan Zoir Hasanov endilikda «Zomin» bosh murabbiyi sifatida faoliyat yuritadigan bo'ldi. Bungacha jamoa menejeri sifatida ishlab kelgan, Asqar Umarov ham klub tizimida qoldi va u endilikda asosan tashkiliy ishlar bilan shug'ullanadi. OFK instruktori sifatida murabbiylik kurslarida ishtirok etib ko'pchilikka yaxshi tanish bo'lgan Hasanov kecha yangi jamoasi bilan ilk mashg'ulotini o'tkazdi. Unga murabbiylar shtabida Berdiyor Mamirov yordam beradigan bo'ldi.

 «So'g'diyona», «Qo'qon-1912» hamda «Obod» singari jamoalardagi faoliyati orqali muxlislarga yaxshi tanish bo'lgan Sardor Qahhorov ham «Zomin» o'quv-yig'in mashg'ulotlariga kelib qo'shildi. Yangi bosh murabbiy qo'li ostiga o'tgan «Zomin» ertaga Muborakning «Mashal» jamoasiga qarshi nazorat uchrashuvini o'tkazadi.