Zafar Polvonov: "Maqsadim ko'proq gollar urish"

"Uchrashuv teng kurashlar ostida o'tdi. Bu o'yinda omad bizlarga kulib boqdi. "So'g'diyona" jamoasi ham yomon o'ynamadi. SHunchaki bu bahsda ularning omadi yurishmadi. "So'g'diyona" jamoasining himoyadagi xatolaridan unumli foydalanib, ketma-ket gollar urib oldim. G'alabada butun jamoadoshlarimning hissasi katta bo'ldi deb o'ylayman. Birinchi davrada nega bu darajada o'ynay olmaganimni to'xtaladigan bo'lsak, jarohat olganim va zaxirada qolib ketganim o'yinimga biroz yomon tasir etgandi. SHu bois birinchi davra o'yinlarida o'zim istagandek o'ynay olmagandim. Hozir esa hammasi joyida, jismoniy holatim ham yaxshi. Umid qilamanki, kelgusi uchrashuvlarda ham gollar urib, jamoamga foyda keltiraman. Maqsadim imkon qadar ko'proq gollar urib, murabbiylar ishonchini oqlash va muxlislarimizni xursand etish", - deydi Zafar Polvonov.

Eslatib o'tamiz, "SHo'rtan" hujumchisi Zafar Polvonov Oliy liganing 17-turidan o'rin olgan "So'g'diyona" - "SHo'rtan" bahsida ikkita gol kiritdi va jamoasiga muhim g'alabani taqdim etdi.