Yuriy Sarkisyan: "Farg'onalik muxlislarga alohida tashakkur bildiraman"

Uning sharafiga bag'ishlab o'tkazilgan tadbirdan so'ng Yuriy Vazgenovich bilan suhbatlashishga muvaffaq bo'ldik.

- O'zbekistonda yosh iqtidorli futbolchilar juda ko'p. Faqat ular bilan to'g'ri ishlash kerak. Lekin ko'pchilikka ular bilan ishlash qiyinchilik tug'diradi. CHunki ular o'z vaqtlarini sarf etishni istashmaydi. Men butun faoliyatim davomida yoshlar bilan ishlaganman. Har yili kuzda qishloqlardan, butun respublika bo'yicha yosh iqtidorlarni ko'rib, ularni kuzatardim. Men "Neftchi"ga faqat mahalliy futbolchilarni jalb etardim.

Yosh iqtidorli, istedodli futbolchilarga omad tilayman. Ular o'z yo'lini topib ketishlarini, futbolga to'g'ri yondoshishlarini istayman. Kelajakda ular o'zbek futbolini rivoji uchun o'z yordamlarini ayamasliklari kerak. Kelajak ularni qo'lida.

Futbol - muxlislar uchun o'yin. Futbolchilar uchun esa bu qiyin jismoniy mashq, mashaqqatli ish. Futbolchi har kuni o'z ustida ishlashi kerak. Agarda sen bir kun mashg'ulotni o'tkazib yuborsang, unda qolganlardan bir qadam orqada bo'lasan. Men shu falsafa asosida futbolchilarni shug'ullantirganman.
"Bunyodkor"ning akademiyasida juda ko'p iqtidorlar. "Bunyodkor" akademiyasi juda ajoyib. Murabbiylar ham malakali.

- Tug'ilgan kunim bilan birinchi kim tabriklagani ham esimda yo'q. CHunki tabriklar juda ko'p. Germaniyadan, Rossiyadan, AQSHdan, Armanistondan, Greciyadan qo'ng'iroqlar bo'ldi. Barcha joylardan tanishlar, do'stlar, shogirdlarim qo'ng'iroq qilib, tabriklashdi.

Farg'onalik muxlislarga alohida tashakkur bildiraman. Ularga sog'inchli salom! Bilasizmi, men Farg'onada ishlaganimda, o'yin boshlanishiga bir soat qolganida stadion ishqibozlar bilan liq to'lardi. Yana qaytaraman, men hech qachon "Neftchi"ga futbolchi sotib olmaganman. Men doim qishloqlardagi iqtidorlarni qidirib topganman, ularni tarbiyalaganman. Mahalliy futbolchilar esa o'z ishlariga sidqidildan yondoshishgan, sodiqlik kuchli bo'lgan o'shanda. SHu boisdan ham muxlislar "Neftchi"ni o'yinini intizorlik bilan kutishardi.

Eng iqtidorli shogirdim kim bo'lgan? Ishoning, meni qo'l ostimdagi futbolchilarning ko'pchiligi juda iqtidorli bo'lishgan. Ularni birortasini ajratib ko'rsatishim qiyin. Agarda kimnidir ajratib ko'rsatish kerak bo'lsa, unda bu Mansur Saidov.

Men o'shanda tasodifan samolyotda uchib ketayotganimda do'stimni uchratib qolganman. Undan qaerga uchyapsan, deb so'raganimda, u internat bo'yicha final uchrashuviga ketayotganini, u erda Farg'ona va Toshkent jamoalari uchrashishlarini aytdi. Men ham u bilan birga kettim. Aynan o'sha erda men kichkina jussali Mansur Saidovni ko'rganman. Saidov o'shanda juda iliq taassurot qoldirgandi. Keyin esa men unga ertaga hujjatlaring bilan menga uchrashasan, deb takidlagandim.

SHahboz Beg'amov yozib oldi