"Yangier"ni tark etgan futbolchilar yuzasidan O'zbekiston futbolchilar uyushmasining munosabati. Muammo nimada?

Kecha saytimiz orqali Pro liga vakili  "Yangier" jamoasini tark etgan futbolchilar haqida malumot bergan edik. 

Unga ko'ra Abdumalik Abdullaev, Robbim Hasanov, Ilhom Alijonov, Sanjar Baratov, Nodir Yo'ldoshev, Nodir Ashurmatov jamoani tark etgan. Ushbu masala yuzasidan O'zbekiston futbolchilar uyushmasi rahbari Kamoliddin Murzoev saytimizga quyidagicha munosabat bildirdi. 

"Saytda elon qilingan maqolada Azamat Abduraimov jamoadan ketgan futbolchilar haqida fikr bildirgan. Bu borada uyushmamiz azolari Robbim Hasanov va Nodir Ashurmatovdan murojaat kelib tushdi.  "Yangier" futbol klubi bu futbolchilarni rasmiy tarzda ketkazishmagan. Ular bilan tuzilgan shartnoma amalda. Biz bu masala bo'yicha O'FA qoshidagi futbolchilarni o'tish va maqomi qo'mitasi va xavfsizlik xizmatiga ham murojaat bilan chiqdik. Azamat Birodarovich bilan suhbatda bu mavzu ko'tarilgan. Hozircha aniq munosabat bildirishmagan. Mazkur jarayon qo'mitada ko'rib chiqiladi. Agarda klub o'zining fikrlarini isbotlay olmasa, klub tomonidan bir tomonlama shartnoma buzilgan, deb topilib, futbolchilarga tovon puli undirishni talab qilamiz. Transferlar oynasi ochilgani munosabati bilan ko'p jamoalarimiz shu asnoda yani shartnomani bekor qilmagan holda, musobaqa reglamentiga zid ravishda ketganliklarini elon qilishmoqda. 

Yana bir eslatma, xabaringiz bor joriy mavsum boshida O'zPfl bilan hamkorlikda musobaqalarni o'tkazish, futbolchilarni o'tish va maqomi reglamentining yangi tahrirda FIFA talablariga asosan qaytadan ishlab chiqilgan. Avvalgi yillardan farqli ravishda, barchasi aniq qilib ko'rsatilgan. Hech bir taraf shartnomani bir tomonlama buzish huquqi mavjud emas. SHunday holatda futbolchiga ham, klubga ham choralar ko'riladi.   Ulardan belgilangan qoidalarga amal qilishlarini so'rab qolaman. SHuningdek hozirda "Jomboy"  "Andijon", "Buxoro" klubi futbolchilaridan shunga o'xshash murojaatlar kelib tushgan ",- deydi Kamoliddin Murzoev.