Xushnudbek Avilov: “Markaziy himoya chizig'i men uchun begona emas”

- “Andijon" jamoasi 17-tur doirasidagi navbatdagi uchrashuvini turnir jadvalida yonma-yon kelayotgan "Buxoro" jamoasiga qarshi o'tkazdi va Superligadagi ilk g'alabasini qo'lga kiritdi. Ushbu uchrashuv haqida nima deya olasiz?
- Avvalambor g'alaba bilan jamoamizning ashaddiy ishqibozlarini tabriklayman, biz uchun ushbu uchrashuvda g'alabaga erishish suv va havoday zarur edi. O'yin to'g'risida gapiradigan bo'lsam, jangovor ruxda o'tganligini aytishim mumkin. “Buxoro” jamoasi ham o'yinga yaxshi tayyorgarlik ko'rishganligini takidlab o'tmoqchiman.

- Siz avvallari qanot himoyachisi sifatida maydonga tushar edingiz, hozir esa jamoa bosh murabbiyning ko'rsatmasiga binoan markaziy himoyachi chig'izida o'ynab kelmoqdasiz. Bu siz uchun qiyin emasmi?
- Men uchun markaziy himoyachi sifatida o'ynash begona emas, sababi Toshkentning "Paxtakor" jamoasida to'p tepgan davrimda ushbu poziciyada o'ynaganman. Markaziy himoya chig'izida xarakat qilish menga qulay, jamoa bosh murabbiyi menga ishonch bildirgani uchun raxmat aytaman va qo'limdan kelganicha jamoam g'alaba qozonishi uchun bor kuch qudratimni ishga solaman

- Jamoaga yangi bosh murabbiy Baxtiyor Xamidullaev keldi, murabbiy to'g'risidagi fikrlaringiz?
- "Andijon" jamoasi bosh murabbiyi Baxtiyor Xamidullaev o'z davrida Respublikamizning eng ko'zga ko'ringan xujumchilaridan biri hisoblangan. Mashg'ulotlarda futbolchilarga ruhiy ozuqa bera oladi, talabchan murabbiy. O'yinlarga yaxshi tayyorlay oladi hamda o'z o'yin taktikasiga ega.

- "Andijon" jamoasi 18-turda qiyin bo'lgan raqib Bekobodning "Metallurg" jamoasiga qarshi safarda maydonga tushadi. Bu o'yindan oldingi fikrlaringiz...
- "Metallurg" jamoasi bilan uchrashuv biz uchun juda muhim hisoblanadi, sababi jamoamiz safar uchrashuvlarida muvaffaqiyatga erishmagan nasib bo'lsa Bekoboddan g'alaba bilan qaytamiz.

Nodirbek Abdullaev yozib oldi