Xo'jamurod Kazakov: "Mashal" stadionining maydoni yomon bo'lganligi - vaqtinchalik holat"

SHu bois B.Vafoev nomli stadion holati haqida bildirilgan fikrlarga javob berish  uchun ushbu stadion bosh direktori Xo'jamurod Kazakovni muloqotga chorladik.

Klub rasmiy tvitteri orqali etib kelgan barcha savollarga stadion bosh direktori javob berib o'tdi.

-  Stadion holati nima uchun bunday holatga kelib qoldi? Qachon ideal bo'lmasa ham yaxshi holatga keladi?

Yurtimizdagi barcha stadionlar malum muddatda o'z holatini butunlay o'zgartiradi. Eng yaxshi stadion bo'lgan taqdirda ham erga qadalgan maysa 6-7 yildan so'ng umuman boshqacha holatda unadi. Bu nafaqat bizni stadion,  balki boshqa stadionlar holatida ham ko'rishingiz mumkin. Misol sifatida “Paxtakor” stadionini ham oling. O'tgan yili bir mavsum davomida berk holatda parvarish qilindi va “Paxtakor” o'z uchrashuvlarini boshqa stadionda o'tkazdi va aynan shu davr oralig'ida maydon holati ideal holatga keltirildi. O'tgan yili “Mashal” birinchi ligada ishtirok etganligi bois mavsumni ertaroq yakunladi. SHundan foydalanib biz o'rtadagi masofa oralig'ida maysani aynan davrlar o'rtasidagi almashinishini amalga oshirdik. “Paxtakor” uchun boshqa stadion bo'lishi mumkin,  lekin “Mashal” uchun boshqa maydon yo'q.

Ayniqsa ob-havoning hatto fevral oylarida ham kuchli sovuq bilan kelishi vaziyatni butunlay o'zgartirib yubordi. Mana masalan,  mart oyida ham faqat sovuq va yomg'ir bilan o'tkazdik. Bu esa butunlay yangilangan maysa uchun yaroqsiz holga keltirib qo'yardi. SHunga qaramay avaylangan maysa bugungi kunga kelib yaxshi holatga kelib bo'lgan. 3 may kuni “Olmaliq”qa qarshi bo'lib o'tadigan uchrashuvga 80 foiz tayyor bo'lishiga ishonaman. Dastlabki ikki turda maydon yomon bo'lganligi bu vaqtinchalik holat edi.

-  Ushbu stadion bir vaqtlar yurtimizning eng yaxshi stadionlaridan biri edi. Hozir esa qoniqarsiz. Yana ijobiy holatga keltirish mumkinmi? Rejalar?

Stadion o'z holatiga qaytadi. Ayniqda keyingi mavsumda alo darajadagi stadionlardan biri bo'ladi. Yil oxirida esa stadionimizni “A” klass stadionlaridan biriga kiritmoqchimiz.

Yuqorida aytib o'taganimdek yangi ekilgan maysa erga butunlay moslashib olmagan. Ayniqsa iqlim mintaqasi issiq bo'lgan Muborak shahridagi ushbu stadionga ekilgan maysa alohida parvarishga ega. Oldinda o'tgan ikki tur uchrashuvi uchun butun stadion haqida yakuniy hulosa berish to'g'ri emas.

Rejamiz bo'yicha may oyining boshidan boshlab stadionimiz to'la tayyor holatda bo'ladi.

-  “Bunyodkor”  va “Paxtakor” bilan bo'lib o'tgan uchrashuvlarda stadion holati yomg'ir tufayli qoniqarsiz holatga kelib qolgan edimi?

Bu shunchaki bahona bo'la olmaydi.  Yomg'ir bu mavsum uchun odatiy hol. O'yin kuni kuchli yomg'ir yog'di va bu faqatgina o'sha kungi o'yin uchun katta tasir o'tkazdi. Maysa ezilgan , lekin yana issiq bilan holatiga qaytadi.

Misol uchun “Andijon” o'ynayotgan stadionni olib qaraylik. Ushbu stadionda maysa yo'q va ob-havo unchalik tasir etmaydi. Bizda esa yangi unib kelayotgan maysa endi ko'tarilib bo'ldi.

-  Stadion holati bo'yicha ham moddiy tomonni yaxshilash kerak bo'ladimi ? Maydon holati bo'yicha mutaxassislarni jalb etsa bo'lmaydimi ? Yoki mahalliy bog'bonlar o'rtacha oylik miqdori ulardan shunchalik pastmi?

Bu borada biz  etarli tajribaga ega bo'lgan yurtimizning eng yaxshi bog'bonlari bilan ham ishladik. Ularni ishi ham ob-havo bilan bog'liq bo'lib qolgandan so'ng hech qanday chora qolmadi. Maydonga ekilgan maysa har 6-7 yildan butunlay almashtiriladi va aynan  bu yilda bizni stadionda bo'lgan.  Mahalliy bog'bonlar o'rtacha 500 mingdan oylik oladi va ular ham maydon sifati bo'yicha barcha ko'nikmalarga ega.
Maysa bo'yicha albatta moddiy imkoniyat ham tasir o'tkazadi. Maydonga kerakli mineral o'g'itlar , eng sifatli dorilar ham tasir o'tkazadi. Bu barcha jamoa stadionlariga tegishli.

-  Stadion holati haqida gap borganda so'rab o'tmoqchi edik. Stadionda matbuot xizmati uchun hech qanday sharoit yaratilmagan. Eng oddiy o'rindiq va rezitka mavjud emas. Bunchalik oddiy holatlar uchun kim javob beradi. Axir yil boshida PFL har bir klubga qatiy talab qo'ygan ediyu. Matbuot xodimlari uchun stol-stul va rezitka bo'lishi kerak. Undan tashqari biz simsiz internet haqida hali so'raganimizcha yo'q.

Bu borada hech qanday etiroz bo'lmasligi kerak. Biz stadionda videooperator va matbuot hodimlari uchun alohida xonalar belgilab chiqqanmiz. Kimdir ko'rmagan bo'lsa kelib ko'rsin. Ayni vaqtda stadionning mehmonlar uchun ajratilgan sektori butunlay yangilangan. Qo'shimcha binolar qo'shilgan. Matbuot hodimlari uchun alohida ishlash xonalari bor. Bu borada hech qanday muammo yo'q. Tan olish kerak dastlabki ikki turda bu borada muammo bo'ldi,  lekin bu yakunlanib bo'lgan. Endi stadionimizga tashrif buyurgan matbuot hodimlari bemmalol ish olib borishi mumkin.