"Xo'jand" bosh murabbiyi Rustam Xodjaev: "G'alaba qozona olmadik. Demak bu bizning aybimiz"

"Biz o'yinni yaxshi boshladik. O'z darvozamiz oldida ko'p xatoga yo'l qo'ydik. Bu esa ikkita gol o'tkazib yuborishimizga olib keldi. Yigitlar yaxshi harakat qilishdi. Men o'yindan oldingi matbuot anjumunida ham aytib o'tgan edim. Bizda bunday katta uchrashuvlarda ishtirok etish tajribasi etarli emas. CHempionat o'yinlarida bunday shiddat yo'q. Mazkur holat xalqaro maydonda to'p tepadigan klublarimizga tasir qilmoqda. "Oltin asr" bilan bahsda qaerdadir tajriba, qaerdadir diqqatni jamlash etishmadi",- dedi Rustam Xodjaev.

- Jamoangiz bir kishi ko'p bo'lib harakat qildi. Lekin ikkinchi bo'limda vaziyatlarni gol bilan yakunlashda muammolar ko'zga tashlanib qoldi...

- Himoyada yanada ishonchliroq o'ynaganimizda bitta gol bilan ham g'alaba qozonishimiz mumkin edi. O'yinda ikkita gol urdik. Ammo mudofaa chizig'idagi etiborsizlik va diqqatni yo'qotish hisobiga yakuniy natija shunday bo'ldi. 

- "Oltin asr"ning kuchli tomonlari bor edi. Ular qanday qilib "Xo'jand"dan ustun kela olishdi?

- Principial jihatdan ular bizdan qaysidir jihatdan yaxshiroq edi, deb ayta olmayman. Raqib qanotlardan qanotlarga tezda o'tdi. Standart vaziyatlarda xavfli vaziyatlar yaratishdi. Bu esa himoyamizdagi palapartishlikka olib keldi. SHu tufayli darvozamizga ikkita gol urishdi. Aks holda o'zimizni ulardan kuchsiz deb hisoblamayman. Ikkinchi bo'limda "Oltin asr" zich himoyalandi. Ushbu uchrashuvda g'alaba qozona olmaganimiz bizning aybimiz.