Viktor Kumikov: "Oxirgi turdagi "Turon" bilan bahsga qadar vazifani bajarishimiz kerak"

"O'yin golgacha bo'ldi, ammo hech kim gol ura olmadi. Bugun futbol kamroq bo'ldi, asosan kurash kechdi. Ular medallar uchun harakat qilishmoqda, biz esa ligada qolish uchun. SHu bois qiziq kechdi. Bugun chap qanotimiz "yo'qolib qoldi". Azamat Isroilov va Abdug'ani Kamolov bugun o'ynay olishmadi. Isroilov shamollab qoldi, Kamolovda esa kichik jarohat. Balki FIFA kunlari vaqtida ular safga qaytishar.

Agar ular bo'lganida Usmonali hujumda o'ynardi. O'yin oxirida tavakkal qildik, ikki hujumchi bilan o'ynadik. Umuman olganda natija o'yinga mos bo'ldi", - deydi Viktor Kumikov.

- O'yindan qoniqdingizmi?
- Yigitlarning intilishidan qoniqdim, ammo Qosimov, Toirov, Vasilev, Sohibjonovdan qoniqmadim. Sen yarim himoyachi bo'lsang hech bo'lmasa to'g'ri pas berishing kerak. Usmonali hujumga o'tganidan keyin to'p uchun hech bo'lmasa kurashdi. Intilishga yana ozgina mahorat qo'shilganida yaxshi bo'lardi. "So'g'diyona" bekorga ikkinchi o'rinda ketmayapti, oldinda bizni "Lokomotiv", "Nasaf" va AGMK kabi klublar kutib turibdi. SHu bois oxirgi turdagi "Turon" bilan bahsga qadar vazifani bajarishimiz kerak. Aks holda so'nggi turda hech nima hal bo'lmay qolishi mumkin.

- FIFA kunlari tufayli ikki haftalik tanaffus yuzaga keladi. Bu jamoaga tasir qiladimi?
- Yo'q, yo'q. Aksincha aytganimdek bizda futbolchilar yo'q. Agar bugungidek tarkib bilan "Lokomotiv"ga qarshi o'ynasak yutqazib qo'yamiz. Safdan chiqqan futbolchilar tezroq qaytishlarini kutamiz.