Vali Keldiev: “Andijon” O'zbekistonning boshqa klublari bilan ham bellashishga qodir”

Vali Keldiev bosh murabbiyligidagi haqqulobodliklar raqobatbardosh jamoa sifatida shakllanmoqdalar. Garchi “Andijon”ga qarshi bellashuvda yirik hisobda yutqazishgan bo'lsa-da, ularning o'yini muxlislarda yomon taassurot qoldirmadi. Uchrashuv tugaganidan so'ng “Norin” bosh murabbiyining fikrlari bilan qiziqib ko'rdik.

- Birinchi bo'lim bo'yicha yigitlarga katta etirozim yo'q, - deya gap boshladi Keldiev. - Ular yomon o'yin ko'rsatishmadi. Baribir “Andijon” jamoasi o'z uyida o'ynadi. SHuning evaziga ikkinchi bo'limda mezbonlar bizga nisbatan bosimni kuchaytirishgani sababli futbolchilarimiz vaziyatlarni to'g'ri baholay olmay qoldilar. Umuman olganda, andijonliklar ikkinchi bo'limga ruhlangan holda chiqdilar. Aynan o'yinning ikkinchi qismida bir qator vaziyatlar bizga halaqit qildi.

- Jamoamizning yo'qotadigan narsasi yo'q edi. Hisob 2:1, 3:1 bo'lgan paytlarda ham oldinga tashlandik. O'z darvozamizdan gollarni mana shunday holatlarda o'tkazib yubordik.

- “Andijon” jamoasining -o'yini haqida fikringiz qanday?

-  “Andijon” yaxshi jamoa. Tarkibida tajribali o'yinchilari bor. SHuning evaziga ular O'zbekistondagi boshqa klublar bilan ham bellasha olishga qodir. Garchi bugun yutishgan bo'lsa-da, menimcha ularning qaysidir manoda o'yini u qadar qovushmadi, shekilli. Yoki biz yaxshiroq o'ynadik. Nima bo'lganda ham natija bo'yicha ular engishdi. Uchrashuv davomida futbolchilarimizning o'yinlaridan qoniqdim. Ammo ayrim vaziyatlar bo'yicha etirozlarim bor. Xatolarim ham bo'ldi. Ayrim futbolchilarimiz sariq kartochkalar tufayli bu o'yinni o'tkazib yuborishdi. SHuning evaziga uch nafar asosiy o'yinchilarimiz bugungi bahsda bizga yordam bera olishmadi.

- “Norin”ga qaytib kelganingizdan keyin jamoa yana kuchayishga erishyapti. Ayting-chi, klubning maqsadi qanday?

- Maqsad – har doim oldinga intilish. Kuchimiz qanchaga etsa, shuncha harakat qilamiz. Yigitlar ham har bir uchrashuvda bor kuchlarini berib o'ynashyapti. Futbolchilarimiz ko'rsatmalarni to'liq bajarishmasa ham chiroyli o'ynashga harakat qilishyapti.

- Jamoangiz birinchi bo'limda yaxshiroq ko'rindi. Ikkinchi bo'limda esa...O'zi tanaffusda nimalar degandingiz?

- Agarda birinchi bo'lim 1:1 hisobida tugaganida hammasi boshqacha ko'rinishda bo'lardi deb o'ylayman. Ammo bo'lim oxirlarida penaltidan to'p o'tkazib yubordik. Hisob 2:1 bo'ldi nima, 3:1 bo'ldi nima? Baribir mag'lubiyat va bu hisoblar bizni qoniqtirmasdi. SHuning uchun hujumlar uyushtirishga harakat qildik. Murabbiyning ko'rsatmalaridan tashqari o'yinchilar hisobni o'zgartirish uchun o'z qiziqqonligi bilan ham oldinga tashlanaveradilar. “Andijon” jamoasiga omad tilayman.

SHuhratbek JO'RAEV