Vadim Abramov: "Muxlislarning ishonchini oqlay olmaganimiz uchun uzr so'raymiz"

"Bugun raqib bizdan kuchli edi. Saudiya Arabistonini g'alaba va keyingi bosqichga chiqqani bilan tabriklayman. O'zbekistondagi ko'plab futbol muxlislari bizdan g'alaba kutishgandi, biroq afsuski, mag'lubiyatga uchradik. Ularning ishonchini oqlay olmaganimiz uchun uzr so'raymiz.

Futbolchilarni psixologik tushkunlik holatidan chiqara olmaganim mening xatoim. Boshidan nima uchun bunchalik bo'shashganimizni tushuntirib berishim qiyin.

Biz raqibning qarshi hujumlari xavfli ekanini bilardik. Birinchi taymda raqib qarshi hujumga o'tib ketmasligiga harakat qildik, afsuski, o'yinga berilib ketdik va xatoga yo'l qo'ydik. Keyin esa kutilmaganda ikkinchi golni qabul qilib oldik. Raqib osongina ikkinchi golni urdi. Bugun hattoki gol ura olmaganimiz hayratlanarli, Saudiya Arabistoni darvozasi oldida aytarli xavfli hujum ham tashkil eta olmadik.Qo'ldan kelgancha harakat qildik. Biz Saudiya Arabistoni qarshi hujumlarda yaxshi o'ynashini bilardik va shunga yarasha tayyorgarlik ko'rgandik. Lekin kutilmaganda birinchi to'pni o'tkazib yuborgach, o'yin uslubimiz yo'qolib qoldi. Buning ustiga ikkinchi golni ham o'tkazdik. Meni ko'proq gol ura olmaganimiz hayron qoldirdi", – dedi Abramov.