Vadim Abramov: "Men hech kimga, hech nimani isbotlamoqchi emasman"

"Uydagi dastlabki o'yin, bazi futbolchilar hayajonlanishdi. Tezkor gol urdik, ammo ularning taktikasiga moslashib qoldik va ularga imkon yaratib berdik", - deydi Abarmov. 

- Temurxo'ja Abduxoliqov maydonda deyarli ko'rinmadi...

- Menimcha Abduxoliqov u qadar yomon o'ynagani yo'q. SHog'ulomovga imkon berdim, biroq Alisherda vaziyat bo'lgani yo'q.  

- Jasur Hasanov 90 daqiqa o'ynashga tayyor emasmi? 

- Tayyor. Lekin raqib katta kuch bilan himoyalanganda Jasur Hasanovga qiyin bo'ladi. Unga kengroq zona bo'lsa yaxshi. Bugun uni uchrashuv oxirida tushirdik. 

- Lutfulla To'raev keyingi o'yinni o'tkazib yuboradi. Bu muammo tug'dirmaydimi? 

- To'g'ri muammo bo'lishi mumkin. Lekin uning o'rnini bosishi mumkin bo'lgan futbolchilar tarkibimizda bor. 

- Nima uchun har bir o'yinda yangilik qilishga urinayapsiz. Masalan, o'tgan turda oliy ligada tushmagan darvozabonni asosiy tarkibga kiritdingiz. Bu safar Sardor Mirzaevni o'ng qanot himoyasiga qo'ydingiz. Bu bilan nimani isbotlamoqchisiz? 

- Yo'q, hech nimani isbotlamoqchi emasman. SHunchaki vaziyatdan kelib chiqib shunday qilayapman. Abror Karimov o'rtoqlik uchrashuvlarida o'zini yaxshi ko'rsatdi. Mamur Ikromov bizning safimizga tayyor bo'lmagan holda kelgandi. Sardor Mirzaev bugun o'ng qanotda o'ynagani rost. Biz uchta himoyachi bilan o'ynadik. Raqib bitta hujumchi bilan o'ynadi. 

- Tarkibda muammolar bor deyapsiz. SHaxsan o'zingiz qandaydir xatoga yo'l qo'ydingizmi? 

- Tarkibda muammo yo'q. Aksincha bizda hali maydonga tushmagan va o'zini ko'rsatmagan futbolchilar juda ko'p. Mavsum endi boshlandi, barchasi kuzda hal bo'ladi. Yaxshi ot keyin chopadi. Futbol juda ham o'zgaruvchan. Bugun ishlayapsan, ertaga ishdan ketishing mumkin. 

- Sizning gaplaringizdan kelib chiqayaptiki xuddi sizga bosim bordek. Klubda ichki muhit yaxshimi?

- Klubda barchasi joyida. Men o'z ishimni qilayapman. Klubning ichki ishlari muxlislarga qiziq bo'lmasa kerak. 

- 8 mart kuni Superkubok uchun bahs bo'lib o'tadi. Bu o'yin siz uchun qanday ahamiyatga ega? 

- Superkubok yaxshi o'yin. Lekin bu biz uchun oliy ligaga tayyorgarlikning bir bosqichi bo'ladi. "Paxtakor" yaxshi klub, har bir jamoa kabi g'alaba uchun maydonga tushamiz. 

Narzulla Saydullaev