Vadim Abramov: "Haqli g'alabaga erishdik"

- O'yin, raqib jamoa haqida fikrlaringiz qanday?

- "Aral" yaxshi jamoa. O'z uyida bekorga bunday yaxshi o'yin ko'rsatishmayapti. Bugun omadimiz keldi. Kerakli vaqtda gol urib oldik. Bizda bir necha vaziyatlar bo'ldi. To'p esa shunchaki darvozaga kirishni istamadi. Umuman olganda, haqli g'alabaga erishdik deb o'ylayman. "Aral" jamoasi esa menda juda yaxshi taassurot qoldirdi.

- Oxirgi marta Nukusda qachon bo'lgandingiz va shahar qanchalik o'zgaribdi?

- Nukusda oxirgi marta 1984 yil bo'lgandim. Albatta, shahar o'zgargan. Ajoyib shahar, men yaxshi tomondan xayratlandim. Men bu erda o'ynagan paytim maydon umuman boshqa edi, mehmonxona ham. Hozir mehmonxona ancha yaxshilanibdi. Stadiondga bazi qo'shimchalar kiritilsa va tabiiy chim bilan qoplansa, jamoa Qoraqalpog'iston Respublikasi sharafini himoya qilishga loyiq deb o'ylayman. Muxlislar ham bunga arziydi. 

- "Dinamo"  Pro ligada mag'lubiyatsiz ketmoqda. Biroq, bu o'yinga qadar uchinchi o'rinda edi. Bunga qanday fikrdasiz?

- Men bilan ko'pincha shunday bo'lgan. Albatta, g'alati. Osiyo kubogida ham shunga o'xshash holat bo'lgandi. Bu meni xayron qoldirmapti. Afsuski, mag'lubiyatsiz ketayotgan bo'lsak ham birinchi o'rinda bormayotgandik. Bugungi g'alabadan keyin birinchi o'ringa ko'tarilamiz. Hammasi yaxshi davom etsa, o'zimizga kerakli natijaga erishamiz.