​Umar Eshmurodov: "Hech kim yutqazish uchun o'ynamaydi. Elit OCHLda yaxshi o'ynash kerak, ammo..."

- Ko'pchilik "Nasaf"ning qoqilganidan so'ng "Neftchi"ni chempion qilib qo'ydi. Shu haqda fikr bildirib o'tsangiz?

- "OKMKga qarshi o'yinimiz qiyin kechdi. Bizga uch ochko kerak. Maydon holati biroz yaxshi emas edi. OKMK ham jiddiy raqib ekanligini bilardik. Odamlarning aytgani emas, kimning aytgani bo'lishini bilasiz. Oldimizda yana to'rtta bahs bor. Nasib, oxirigacha harakat qilamiz. OKMKga qarshi o'yinda ham yutib ketishimiz mumkin edi, ammo maydon holati biroz muammo tug'dirdi.

- "Nasaf" Dubayda yirik hisobda mag'lub bo'ldi. Dubaydagi mag'lubiyatdan so'ng "Nasaf" qanchalik tanqidlarga loyiq, sizningcha?

- Elit OCHLda ham yaxshi o'ynash kerak, lekin futbolchilarni ham tushunish kerak. Futbolchilar har uch-to'rt kunda o'yin o'tkazmoqda. Yo'lda ham vaqt o'tib ketyapti. Ayrim futbolchilar dam olmasa bo'lmas edi. Shu sababli murabbiylar qarori bilan ayrim futbolchilarga dam berildi, lekin imkoniyat taqdim etilgan futbolchilar ham o'zini yaxshi jihatdan namoyish etishga intiladi. Hech kim yutqazish uchun o'ynamaydi. Biz har bir o'yinga asosiy tarkibda o'ynayversak, kuchimizni to'g'ri taqsimlay olmaymiz. Yo'l uchun ko'p kuch sarflayapmiz. Tanqidlarga etibor bermaymiz.

- Terma jamoamiz yangi bosh murabbiy qo'l ostida dastlabki uchrashuvlarda ishtirok etdi. Shuningdek, 5-dekabr kuni JCH-2026 qura tashlash marosimi o'tkaziladi. Terma jamoa futbolchisi sifatida qaysi raqiblar bilan bir guruhdan joy olishni istagan bo'lardingiz? Sizningcha, qaysi terma jamoalar bilan o'ynasak yaxshiroq bo'ladi?

- Qurada kamida ikkita kuchli terma jamoaga tushamiz. Imkon qadar o'ta kuchli bo'lmagan terma jamoalar bilan bir guruhdan joy olmasligimizni istayman. Qulayroq guruhdan joy olsak, yaxshiroq natijaga erishishimiz mumkin bo'ladi. Agar juda kuchli terma jamoalar tushib qolsa, vazifa ancha qiyinlashadi. To'g'ri, biz guruhdan chiqamiz va katta natijaga erishamiz deya gapirib yubora olamiz. Braziliya bilan o'ynaymiz deyishimiz ham mumkin, ammo daraja baribir boshqacha. Misol uchun, Urugvayga qarshi o'yinda ham ko'rdik. Jismoniy jihat va boshqa kamchiliklarimiz ko'p ekan. Shuning uchun osonroq raqiblar tushgani maqul. Kannavaro bilan asosan jismoniy holatni yaxshilash ustida ishlandi. Oldindagi 3-4 yig'inda o'z ustimizda ishlab, jamoa o'yinini yana yaxshilay olishiga ishonaman. Biz ham JCHga borib yaxshiroq ishtirok etib kelishni xohlaymiz.