Ulug'bek Mirzaev: "Qog'ozda "Nasaf" favorit, balki penaltilar seriyasida omad "Andijon"ga kulib boqar"

Unda mamlakatning so'nggi yillardagi eng barqaror jamoalaridan biri — Qarshining "Nasaf"i bilan tarixiy finalga ilk marta yo'l olgan “Andijon” jamoasi to'qnash keladi.

O'yin oldidan o'zining tahlillari bilan tajribali futbol mutaxassisi Ulug'bek Mirzaev bo'lishdi. Muttaxassis "Nasaf"ning ustunligi va "burgutlar"dan nima kutish mumkinligi haqida ham to'xtalib o'tdi. 

"Hamma tushunib turibdiki, bu o'yinning favoriti "Nasaf" hisoblanadi. Jamoa Superkubok, Kubok finallari, chempionlik uchun kurashlar, OCHLda ishtirok etish borasida katta tajribaga ega. Yani bunday muhim uchrashuvlarda to'p tepish tajribasi ulardagi ko'plab futbolchilarda bor. "Andijon" esa bunday jiddiy o'yinga ilk bor duch kelyapti. "Nasaf" tarkibidagi futbolchilar holati, turnir jadvalida birinchi o'rinda ekanligi, jismoniy holati yani har tomonlama shakllangan. Qog'ozda "ajdarlar" raqibidan barcha jabhalarda kuchli. 

"Nasaf" Superligani juda kuchli boshlamaganiga qaramay sekin-asta birinchi o'ringa ko'tarilib oldi. O'yin taqdiri faqat shu bahsda hal qilinadi. Shu bois har qanday natija bo'lishi mumkin. Balki "Andijon" hisobni ochar yoki tenglashtirar. Penaltilar seriyasida omad kulib boqishi mumkin. Bitta bahsdan iboratligi "burgutlar"ga "vabank"ga borish imkonini beradi. "Andijon" hech narsa yutqazmaydi. Jamoa yutqazgan taqdirda ham muxlislar koyishmaydi, ular ham raqib kimligini bilib turishibdi. Bu tomonlama "Andijon"da bosim kamroq. 

Shuningdek, Andijondan ko'plab muxlislar tashrif buyurishi kutilyapti. Lekin Toshkentda "Nasaf" muxlislari ham ko'p. O'yin juda qiziqarli kechadi. Cheran, Xebay, Mozgovoy, Muhitdinov kabi futbolchilarga qarshi qanday o'ynashi qiziq. Lekin jamoalar to'qnashuvida Superligada durang kuzatilgandi, o'tgan yili Kubokdan chiqarib yuborgandi. Oxirgi yillarda "Andijon" "Nasaf"ga qarshi bemalol o'ynamoqda. Bugun nima bo'lishini ko'ramiz va kuzatamiz",- deydi Ulug'bek Mirzaev.

Eslatib o'tamiz, Superkubok bellashuvi bugun "Bunyodkor" stadionida 19:30 da boshlanadi. Barchaga yoqimli tomosha tilab qolamiz.