Uchqun Qobilov: "Dinamo"ning ikki o'yinda 16 ta gol urgani jamoaning o'z o'yinini topib olganidan dalolat"

- Ajoyib g'alaba bilan tabriklaymiz. 8:0 hisobida yakunlangan bu o'yin Dinamo uchun joriy mavsumdagi eng oson bahs bo'ldi, desak qo'shilasizmi?

- To'g'risini aytganda, chindanam oson g'alabaga erishdik. Ammo bu faqat raqibning kuchsiz o'yin namoyish etganidan emas, jamoamizning o'yinga yaxshi tayyorgarlik ko'rgani va ayni damda jismoniy holati yaxshi ekanligini bildiradi. Har qanday holatda ham biz raqiblarni hurmat qilib, har bir bahsga jiddiy tayyorgarlik bilan maydonga tushamiz.

- Ketma-ket ikkinchi o'yinda 8:0 hisobidagi g'alaba qo'lga kiritildi. Ikki o'yinda 16 gol urish nimadan dalolat?

- SHuni aytishim mumkinki, bugungi kunga kelib Dinamo jamoasi futbolchilari mavsumdagi eng yaxshi sport formasiga kirib ulgurishdi. Yodingizda bo'lsa, 1-2 oy oldin jamoamiz o'yindan-o'yinga yaxshiroq sport formasiga kiradi degan edim. Bugunga kelib biz kutgan jismoniy holat va jamoaning sport formasi eng yuksak holatga keldi. So'nggi ikki bahsda 16 ta gol urganimiz jamoamizning o'z o'yinini topib olganini bildiradi. Yigitlar maydonda bir-birlarini yaxshi tushunib harakat qilishmoqda. Bu borada to'xtab qolmasdan, o'sishda davom etishimiz shart. Ayniqsa, yozgi tanaffusdan foydalanib tayyorgarlik ishlarini yanada yaxshiroq olib borishga intilamiz.

- Bugun bir qator etakchi futbolchilar barvaqtroq zaxiraga olindi. Bu keyingi o'yindagi Nurafshon bilan bahs uchun qilindimi?

- Yo'q, bu keyingi o'yin uchun qilinmadi. Biz bitta tarkibni emas, butun jamoani maydonga tushirib, o'yin amaliyotiga ega bo'lishini istaymiz. Yani, jamoaning asosiy tarkibi faqat 11 futbolchidan emas, butun jamoadan iborat bo'lishi lozim. Har bir yosh futbolchimizni istalgan payt asosiy tarkibga tushira olishimiz kerak. SHu uchun ularni o'yin tushurib, tayyorlayapmiz.

Dinamo Matbuot xizmati.