"Turon" haqidagi xabarlarga oxirgi daqiqagacha ishonganimiz yo'q" - Rahimjon Davronov

Atrofda hammaning munosabati turlicha bo'lyapti. Lekin hozirgi vaziyatda eng qiyini futbolchilarga. Ular endi o'zlariga yangi jamoa topishlari kerak bo'ladi. Xo'sh, jamoadagi futbolchilar qanday fikrda? Bu borada darvozabon Rahimjon Davronovning fikrlari bilan qiziqdik. 

- "Turon" haqidagi xabarlar ko'pchilik uchun kutilmagan bo'ldi. Futbolchilar bu malumotni qanday qabul qildi? Birinchi nima fikr yuzaga keldi?

- To'g'risi hamma shok holatiga tushdi. Hattoki oxirigacha ishonganimiz yo'q. Balki qandaydir tushunmovchilik yuz bergan, deb o'yladik. Futbolchilarning barchasi xayron. Bu xabardan so'ng o'zimizni kelajagimizni o'ylab ketdik. Nima bo'ladi endi, qaysi klubga boramiz? 2-3 kishi o'ziga jamoa topishi mumkin. Qolganlarchi? Mayli shunday narsa bo'lishi kerak ekan bo'ldi. 

- Hozirda futbolchilar yangi jamoa izlash harakatiga tushgan. O'zingiz bu borada qandaydir qarorga keldingizmi?

- Albatta. Barcha jamoa qidirmoqda. Ular qatorida o'zim ham. Oldinda yana 2ta tur bor. Birinchi davra yakuniga etadi. Jamoa topsak topdik, bo'lmasa keyingi yil harakat qilib ko'ramiz. Ahir boshqa iloji yo'q. 

-  Turon hech bir jabhada Superligani qolgan klublaridan qolishmaydi. Tayyorgarlik ham maromida bo'lgandi. Baxtiyor Ashurmatovga etarlicha vaqt etmadimi yoki Denis Bushuevga?

- O'ylashimcha, ikki murabbiyda ham vaqt etarli bo'ldi. Ular ham qo'lidan kelgancha harakat qildi. Biz ham imkoniyatimiz darajasida o'ynadik. Omad etishmadi, deya olaman. 

- Klub rahbariyati futbolchilar oldidagi majburiyatlarini bajardimi? 

- Vada berishdi. Qo'llaridan kelgancha hisob-kitob qilamiz, deb aytishdi. Qarzdorlik yo'q edi. Hammasi yaxshi ketayotgandi. 

- Xususiy klublar haqida fikriz qanday? Futbolchi sifatida turli jamoalarda o'ynagansiz va bu borada qarashlariz bor?

- Xususiy klub bo'lgandan keyin qandaydir imtiyozlar berilishi kerak. Bunday jamoa shakllantirish hammaga ham emas. Rahbariyat futbolni juda yaxshi ko'radi. Ularni qo'llab-quvvatlash kerak.

- Klub bazasida kimlar qoldi?

- Hech kim qolgani yo'q.

Abdulaziz Iskandarov