"Turon" – "Bunyodkor" uchrashuvidagi bahsli vaziyat yuzasidan O'zFHM bayonot berdi. Qanot hakami chetlatildi

Unga ko'ra, uchrashuvning 5-daqiqasida “qaldirg'ochlar” yarim himoyachisi Farhod O'tkirov tomonidan urilgan golda o'yindan tashqari holat bo'lgani qayd etildi.

Mazkur holat O'FA hakamlar qo'mitasi tomonidan atroflicha ko'rib chiqildi. Yuqorida keltirilgan videomalumotlar qo'mita vakillariga ilova qilindi. Unga ko'ra, ushbu vaziyat VAR hakamlari tomonidan ko'rib chiqilgan, biroq ofsaydni qayd etish uchun etarlicha tasvirlar va dalillar bo'lmagani sababli, VAR protokoli bo'yicha ular golni inobatga olishga majbur bo'lgani oydinlashdi. VAR hakamlari faqatgina MTRK uzatgan kadrlardan foydalana olishini, "Mycujoo" tomonidan suratga olingan tasvirlar esa ularga taqdim qilinmasligini (texnik tomondan buning iloji yo'q) inobatga olsak, bu vaziyatda VAR vakillari ojiz qolgan. Vaholanki, “Mycujoo”ning tasvirida ofsaydni ilg'ab olish qiyinchilik tug'dirmas edi. SHu tariqa, ushbu dalillardan kelib chiqqan holda, hakamlar qo'mitasi vakillari VAR hakamlarini aybsiz deb topdi.

SHuningdek, o'yinning bu vaziyatida nazoratni qo'ldan chiqargani va o'yindan tashqari holatni qayd etmagani sababli, uchrashuv yordamchi hakami Feruz Dostonov aybdor deb topildi va qo'mita unga nisbatan Superliga bahslaridan 4 ta o'yinga chetlatish va quyi ligaga tushirish jazosini qo'lladi.