Turkiya - ajoyib imkoniyat
10 iyu 2022 01:19
Yangiliklar

Turkiya - ajoyib imkoniyat

SHu kunlarda Nodirxo'ja Yuldashev boshchiligidagi Odil Ahmedov FA tarbiyalanuvchilari Istanbulda bo'lib turibdi.

Hamyurtlarimiz kecha "Galatasaroy" yoshlari bilan durang o'ynashgan. Oldinda "Fenerbahche" tarbiyalanuvchilari bilan uchrashuv kutib turibdi...

Bunga odatiy nazorat bahsi sifatida qarashingiz mumkin. Lekin mazkur uchrashuvlar Turkiyaga olib ketilgan 15 nafar futbolchi uchun ulkan, hatto undan ham kattaroq imkoniyat aslida. Ular ayni paytda mahalliy skautlar nazarida bo'lib turishibdi.

Turkiya tarixidagi eng yaxshi futbolchilarning aksari 10-12 yoshlarida katta jamoalar tomonidan kashf qilingan. Masalan, Emre Belozo'glu 11, Arda Turan 12 yoshda "Galatasaroy"ga transfer bo'lgan edi. Ularning keyingi faoliyati hammaga malum. Emre A Seriya, APL va La Ligada yuqori saviyada o'yin ko'rsatgan bo'lsa, Ardadan "Atletiko" bilan ECHL finali va "Barselona" libosidagi iliq xotiralar qoldi.

So'nggi yillarda Turkiya top-5 ligalarga o'tish va futbolchi sifatida o'sish uchun Rossiya, Ukraina yoki Belarusga nisbatan 5-6 marta yaxshiroq tramplin bo'lib qoldi. Buni transferlar ko'lamidagi farqdan anglab olish mumkin.

Masalan, bir yil oldin "Fenerbahche"ning asosiy tarkibiga qo'shilgan 16 yoshli Arda Guler mavsum davomida 12 o'yinda 3 ta gol urdi. Uning transfer qiymati 1 yil ichida 60 marta o'sdi va ayni paytda Italiyadagi SHomurodov bilan deyarli bir xil baholanyapti. SHuningdek, Arda Turk Superligasidagi o'yinlari orqali PSJ, "Barselona" va "Arsenal"ning radariga tushishga ham ulgurdi.

Xullas, Turkiyada katta futbolchi bo'lish uchun katta imkoniyatlar bor. Ammo bu yoshda mahalliy akademiyalarga transfer bo'lish uchun siz rostakam vunderkind bo'lishingiz kerak...