Tojiev vs SHodiev: Osiyo o'yinlariga kim borishi kerak?

Bu o'yinda termamiz ustozi Mirjalol Qosimov asosan Osiyo o'yinlariga boradigan tarkibni sinab ko'radi. Demak, mazkur bellashuvda 23 yoshgacha futbolchilar to'p suradi. SHuningdek, yoshi 23dan katta to'rt nafar o'yinchining ham maydonga tushishi kutilmoqda.

Bular - Islom To'xtaxo'jaev, Fozil Musaev, Farhod Tojiev va Vohid SHodiev. Kecha bo'lib o'tgan o'yinoldi matbuot anjumanida Mirjalol Qosimov Osiyo o'yinlariga boradigan yoshi 23dan katta ikkita futbolchining kimligini aytib o'tdi. Yani, To'xtaxo'jaev bilan Musaevning Inchonga borishi rasman aniq bo'lgan. Yana bitta o'ringa esa ikkita nomzod bor. Yani, Farhod Tojiev bilan Vohid SHodiev. Bugungi bellashuvda kim o'zini ko'rsatsa Qosimov o'shani musobaqaga olib ketishini malum qildi.



Farhod Tojiev ham, Vohid SHodiev ham yaxshi saviyadagi hujumchilar hisoblanadi. Farqi shundaki, Vohid Farhodga nisbatan terma jamoada kam o'ynagan. Xo'sh, sizningcha, Mirjalol Qosimov Osiyo o'yinlariga kimni olib ketgani maqul: Farhod Tojievnimi yoki Vohid SHodievmi? Marhamat, bu borada o'z fikr-mulohazalaringizni bildirishingiz mumkin. Bugungi o'yindan keyin bu mavzuga yana qaytamiz.

X.Xoliqov.