Toshkent viloyati derbisida Dilmurod Karimov maydonga tushmaydi

Bu Pisleginning shu yil hisobida “Metallurg” ishtirokidagi birinchi uchrashuvni boshqarishi bo'ladi. Mazkur uchrashuvda “Metallurg”ga jamoa pleymeykeri Dilmurod Karimov yordam bera olmaydi. U sariq kartochkalarning to'planib qolganligi bois maydonga tushmaydi.

Bu yil birinchi davrada Olmaliqda bo'lib o'tgan uchrashuvda mezbonlar 2:0 hisobida g'alaba qozonishgandi. Doniyor Ismoilov hamda Farhod Tojievlarning gollari “Olmaliq”qa muhim 3 ochkoni taqdim etgandi.

“Olmaliq” jamoasiga qarshi birinchi davrada zahiradan maydonga tushgan SHohnazar Norbekov ikkinchi davradan etiboran olmaliqliklar safida to'p surayapti. Bu turda u sobiq jamoadoshlariga qarshi maydonga tushishi kutilmoqda.

Poytaxt viloyati jamoalari derbisi 2008 yildan boshlangan. O'tgan davr mobaynida poytaxt viloyati vakillari bir birlariga qarshi 17 ta o'yinda ro'baro' kelishgan. Ustunlik “Olmaliq” jamoasi tomonida. Konchilar o'tkazilgan o'yinlarning 9 tasida zafar quchishgan bo'lishsa, metallurgchilar 7 ta uchrashuvda muvaffaqiyat qozonishgan. Faqat 1 ta o'yinda durang natija qayd etilgan. Kiritilgan va o'tkazib yuborilgan to'plar farqi 36:32, “Olmaliq” jamoasi foydasiga.

Mazkur jamoalarning to'qnashuvida olmaliqlardan eng ko'p gol kiritgan o'yinchi Mo'ydin Mamazulimov bo'lib turibdi. Uning hisobida 6 ta gol bor. Bekobodliklar hujumchisi Zohid Abdullaev esa raqiblari darvozasini 5 marta ishg'ol etgan.

Bekoboddagi uchrashuvlarga to'xtaladigan bo'lsak ularning faqat bittasida durang natija qayd etilgan. Qolgan 7 o'yin bekobodliklarning g'alabasi bilan intiho topgan.

Oxirgi turda G'uzorda “SHo'rtan”ga imkoniyatni boy berib qo'ygan “Metallurg” futbolchilari poytaxt viloyati derbisiga jiddiy tayyorgarlik ko'rayapti.