Tohir Kapadze: “Boshqa klublarda ham hujum chizig'i asosiy muammo sanaladi”

Bundan oldinroq xabar topganimiz bois, tushlikdan so'ng Farg'ona tomon yo'lga chiqdik. Kechki soat 17:30da Qirguli mavzesidagi “Neftchi SK” stadionida boshlangan ushbu tadbirda OAV xodimlaridan tashqari ashaddiy ishqibozlar ham tashrif buyurdi.

Klub raisi Tohir Kapadze muxlislar tomonidan berilgan savollarga atroflicha javob berdi. Xususan Tohir Veysalovich ishqibozlarning hakamlar to'g'risidagi savoliga dangal va ochiq-oydin javob qaytardi. Bu esa ko'pchilik qatori bizning ham etiborimizni tortdi.

- Toshkent jamoalari o'yinlarida bunday xatoliklarni ko'rmaymiz. Nega hakamlar bu jamoadan cho'chiydimi?
- (Kulib) Agarda biz ham poytaxt klubi bo'lganimizda, bizga balki biroz engillik bo'larmidi.

- Davralar oralig'ida nega tajribali hujumchi olib kelinmadi. Masalan Anvar Berdievni qaytarishni imkoni bor ediku?
- To'g'ri, takidladingiz bugungi kunda boshqa klublarda ham aynan hujum chizig'i asosiy muammolardan biri bo'lib turibdi. Yil boshida Ro'zimboy Ahmedovdan umidimiz katta edi. Unga boshqa klublardan qiziqish bo'layotganida, ishqibozlar shaxsan o'zimga qo'ng'iroq qilib, Ahmedovni qanday bo'lmasin olib qolishimizni iltimos qilgandi. Yakunda Ro'zimboy bilan shartnomani uzaytirishga qaror qildik. Ammo mana ko'ryapsiz, gollar kam. Juda kam. Yaqinda Ro'zimboyni oldimga chaqirib, qattiq gapirib, gollar juda oz ekanligini takidladim va ogohlantirdim. Sizlar duo qilinglar, hujumchilarimizni yo'li ochilsin va sermahsulligi bilan sizlarni quvontirib, jamoamizga foyda keltirsin. Anvar Berdievga keladigan bo'lsak, uning “Neftchi”ga xizmati singganligini inkor eta olmayman. Haqiqatdan ham mahoratli hujumchi. O'z vaqtida to'purarlik mahoratini namoyon etgan. Yaqinda uni ortga qaytarish uchun jamoaga taklif ham qildik. Mashg'ulotda kelib, 1-2 shug'ullandi ham. Darvozaga 18ta to'p tepdi, shundan 15tasi aniq bordi. Bundan ham bilsa bo'ladiki, Berdievning hamon yaxshi formada ekanligini. Ammo uni “Neftchi”ga qaytarish birgina mening qo'limda emas. Viloyat hokimi ham ruhsat berishi kerak edi. Agarda men “Neftchi” ishlab faoliyat yuritsam, Berdiev bilan Akmal Xolmatovni tantanali tarzda, munosib kuzatib qo'yamiz. Buni futbolchilarning o'zigi ham aytganman. Stadion xayrlashuv uchrashuvini tashkil etib, zarbof to'nni kiydiramiz va bu orqali mexnatini qadrlagan bo'lamiz.

- Rossiyalik darvozabon Evgeniy CHeremesinni O'zbekisiton fuqarosi qilishni imkoni bormi?
- Bu juda nozik va qiyin masala. Agarda bu juda zarur bo'lganida terma jamoalar markazi masalani ko'rib chiqqan bo'lardi.

- Abdumavlon Abdujalilov singari “Paxtakor”ning qolgan o'yinchilarini ham to'liq sotib olinsa bo'lmaydimi?
- Oldin sizlarga shuni aytib qo'yay. Iqtidorli darvozabon Abdumavlon Abdujalilovning transferini biz “Paxtakor”dan to'liq sotib oldik. Keyin u bilan 2,5 yilga mo'ljallangan bitim tuzdik. Keyingi yil chempionatimizda xorjlik posbon o'ynay olmaydi. SHu bois bu kelajakni o'ylab qilingan transferdir. Abbos Maxstaliev va Muhsin Ubaydullaevga kelsak, “Paxtakor”ni ularni qo'yib yubormaydi. Sotadigan taqdirda ham transfer narhini juda baland aytishi mumkin. Bu hozircha bizga to'g'ri kelmaydi. Balki ularni ham kelgusidagi to'liq “Neftchi”ga sotib olarmiz.

Tohir Kapadzening so'z boyligi yuqori va gapga chechanligi bois muxlislar bilan bo'lib o'tgan ochiq muloqotni deyarli u kishini o'zi olib bordi. So'zlashuv jarayoni ravon ekanligi klub raisini eng katta yutuqlaridan biri desak mubolag'a bo'lmaydi. Ishqibozlar tomonidan berilgan nozik va shu bilan birga murakkab bo'lgan savollarga ham Tohir Kapadze, jilmayib javob qaytargan xolda, ustalik bilan “chiqib ketdi”.

Islombek Rustambekov yozib oldi.