Terma jamoamizning asl kuchini Osiyo o'yinlarida ko'ramiz

O'yinda har ikki jamoa ehtiyotkor bo'lib to'p tepgani uchun hisob ochilmadi. Albatta, darvozaga gol urish uchun imkoniyatlar bizda ham, raqibda ham bo'ldi. Lekin darvozabonlarning ishonchli harakati sabab to'p kiritilmadi. Bu o'yinda milliy terma jamoamiz emas, balki Inchonda bo'lib o'tadigan Osiyo o'yinlarida qatnashadigan jamoa to'p surgani uchun tarkibda legionerlar o'ynamadi.

O'yin haqida nima deyish mumkin? G'alaba qozonishni xohlaganimiz bilan bunga istak va xohish kamdek ko'rindi. Nima bo'lgan taqdirda ham bu o'rtoqlik uchrashuv edi, shu bois yigitlar shunga monand harakat qilishdi. Hamma o'zini ehtiyot qilib o'ynashiga to'g'ri keldi. Umuman olganda bahs qiziqarli kechgani yo'q. O'yinda shiddat kuzatilmadi. Har ikki tomon ham zavqli bo'lmagan ftubol namoyish etdi. Ko'pincha shunday o'yinlarni ko'rganda tez zerikib qolasiz.

Futbolchilarimizda individual mahorat chakki emas ekan. Faqat jamoaviy o'yin borasida hali ancha ishlash kerakligi ko'rinib qoldi. Bundan tashqari, tashkil qilgan hujumlarimiz ham sodda ko'rinish oldi. Ko'p vaziyatlarda Sardor Rashidov o'yinni o'z qo'liga olishga intildi-yu, biroq “yolg'iz otning changi chiqmas” deganlaridek hadeb individual harakatlarga urg'u berish natijaga erishiladigan paytda pand berib qo'yishi mumkin.

O'yin tempiga esa maktab bahosida -4 qo'ysa bo'ladi. Xullas, bu bahs terma jamoamizning imkoniyatlarini ochib bera olmadi. SHunday ekan, asl kuchimizni baribir Osiyo o'yinlarida bilib olamiz. Hozirdan bu musobaqada bemalol g'olib bo'lishimiz mumkinligi haqida hamma erda gapirilyapti. Buning uchun terma jamoamizda salohiyat etarli. 20 yil oldingi natijani takrorlash uchun hozirgi avlodda imkoniyat bor. Faqat qishda Ummonda bo'lib o'tgan U-22 Osiyo chempionatidagi kabi to'ydan oldin nog'ora chalib yana quruq qaytmasak bo'lgani. Negaki o'shanda ham bizning tarkib eng kuchli deya etirof etilgan, biroq amalda hatto guruhdan chiqa olmagandik. Ammo bu safar hammasi boshqacha bo'ladi degan umiddamiz.

X.Xoliqov.