Terma jamoa gvardiyachilari #8. Asror Aliqulov

Bugun O'zbekiston terma jamoasida o'yin o'tkazish bo'yicha sakkizinchi o'rinda turgan himoyachi Asror Aliqulov haqida malumotlar beramiz. Ayni paytda G'uzorning “SHo'rtan” klubida faoliyat olib borayotgan futbolchi 63 marta milliy terma jamoa safida maydonga tushgan.

Aliqulov 63 uchrashuvning 53tasida to'liq o'ynagan. 6 marta asosiy tarkibda maydonga tushgan hamda uchrashuv davomida boshqa futbolchiga almashtirilgan. Qolgan 4ta bahsda esa murabbiylar tomonidan zaxiradan maydonga tushirilgan. Asror Aliqulov milliy terma jamoa safida jami 5036 daqiqa harakat qilgan.

Ilk o'yini va sariq kartochkasi

Aliqulov terma jamoadagi o'z debyutini 1999 yilning 11 iyul sanasida Malayziyaga qarshi o'rtoqlik uchrashuvida o'tkazgan. Uni terma jamoaga marhum Mahmud Rahimov jalb qilgan. O'sha kuni yarim himoyachi uchrashuv tugashiga 21 daqiqa qolganida Mirjalol Qosimovning o'rniga maydonga tushgan. Samarqandda tashkil etilgan bahsda vakillarimiz 3:0 hisobida zafar quchishgan.

Terma jamoa safidagi 63ta bahsda 5 marta ogohlantirish olgan va biron marta ham maydondan chetlatilmagan. Aliqulov o'zining ilk sariq kartochkasini 2001 yilda Malayziyada bo'lib o'tgan “Merdeka Kubogi”da Bosniya va Gercegovinaga qarshi o'yinda olgan.

Markaziy himoyada o'ynagan Asror Aliqulovning kam gol urishi barchaga malum. U terma jamoada gol ura olmagan.


 

Ishtirok etgan musobaqalari

Qahramonimiz Osiyo Kubogi-2004 saralashi va final bosqichida ishtirok etgan. Bundan tashqari Aliqulov JCH-2002, JCH-2006 va JCH-2010 saralashlarida ham maydonga tushgan. 2004 yil Xitoyda o'tgan Osiyo Kubogida Asror Aliqulov terma jamoamiz safida barcha 4ta uchrashuvda maydonga tushgan va to'liq o'ynagan. Osiyo kubogi-2004da O'zbekiston guruhda Iroq, Saudiya Arabistoni va Turkmaniston ustidan bir xil 1:0 hisobida g'alaba qozongan. CHorak finalda Bahraynga penaltilar seriyasida yutqazib qo'yib musobaqani tark etgan.

Raqib terma jamoalar

Futbolchi sifatida 31ta davlat terma jamoalariga qarshi maydonga tushgan. Qatar, Tailand, Saudiya Arabistoni kabi jamoalarga qarshi 5 martadan o'ynagan. Keyingi o'rinda Bahrayn joylashgan - 4ta o'yin.

Sariq kartochkalari

Yuqorida aytib o'tganimizdek Aliqulov terma jamoa safida jami 5 bor sariq kartochka bilan jazolangan. Asror bu ogohlantirishlarni 3ta jamoaga qarshi o'yinlarda olgan.

Qatarga qarshi uchta o'yinda sariq olgan himoyachi Bahrayn hamda Bosniya va Gercegovina bilan bahslarda bittadan ogohlantirish “ishlab olgan”. 

Yillar

Aliqulov 1999-2008 yillar davomida terma jamoada faoliyat olib borgan. U 2008 yil eng ko'p uchrashuv o'tkazgan – 12ta. 2004 yil esa qahramonimiz 11ta o'yinda harakat qilgan.

Asror Aliqulov terma jamoadagi eng so'nggi uchrashuvini 2008 yil 15 oktyabr kuni Yaponiya qarshi o'tkazgan. JCH-2010 saralashidagi o'yinda 1:1 hisobi qayd etilgandi.


Asror Aliqulovning yubiley o'yinlari

#	Raqib	O'yin maqomi	Hisob	Sana	Daqiqasi
1	Malayziya	O'rtoqlik uchrashuvi	3:0	11.07.1999	21
10	Ummon	JCH-2002 saralashi	4:2	13.10.2001	39
20	Tojikiston	Osiyo Kubogi-2004 saralashi	4:1	17.11.2003	90
30	Falastin	JCH-2006 saralashi	3:0	08.09.2004	90
40	Bahrayn	JCH-2006 saralashi	1:1	08.10.2005	90
50	Qozog'iston	“Alma TV” kubogi	1:1	11.03.2007	90
60	Qatar	JCH-2010 saralashi	0:3	06.09.2008	90
63	Yaponiya	JCH-2010 saralashi	1:1	15.10.2008	90

Keyingi juma kuni Maksim SHackix haqida malumot beramiz.

Narzulla Saydullaev tayyorladi.