Temurxo'ja Abduxoliqov: “Imkoniyatlardan unumli foydalana olmadik”

- O'yinni o'zingiz ham ko'rdingiz, yutadigan raqib edi. Imkoniyatlardan unumli foydalana olmadik. Biroz omad etishmadi. Gol urishda biroz oqsayapmiz. O'ylaymanki kelgusida hammasi yaxshi tomonga o'zgaradi – deya gap boshladi Abduxoliqov.

- G'alabani saqlab qolish uchun jamoaga nima etishmadi deb o'ylaysiz?
- Tartibmi...? Bilmadim. Biz yana bitta gol urishimiz kerak edi. SHunda hammasi o'zimiz istagandek kechardi. Eng asosiysi vaziyatlardan foydalana olmadik.

- Uchrashuv davomida o'ng qanot yarim himoyasiga o'tib ham xarakat qilganingizni ko'rdik. Bu murabbiyning ko'rsatmasi edimi?
- Etibor bergan bo'lsangiz o'yinni ikkita hujumchi bilan boshladik. Bunday paytda bitta hujumchi kerak bo'lsa qanotga yoki markazga o'tib, yordam berishi kerak. Bu o'ziga xos taktika edi. Bir joyda “qotib” qolish kerak emas.

- Sizda yangi jamoaga kirishib ketish jarayoni qanday kechmoqda?
- Umumiy jamoaga moslashib ketishim qiyin bo'lmadi. Deyarli barcha futbolchilar bilan oldindan tanish edik. Ammo o'yinga to'liq moslashib ketish uchun biroz vaqt kerak. Yana bir nechta uchrashuvlardan so'ng hammasi ko'ngildagidek kechishiga ishonaman. Mana bugun OCHLdagi ilk ochkoimizni qo'lga kiritdik. Kelgusi uchrashuvlarda g'alabamizni ham nishonlashga astoydil urinamiz.

- Eronning “Fulad” jamoasi bugun sizda qanday taassurot qoldirdi?
- “Fulad” yaxshi, intizomli jamoa ekan. Menimcha hamma Eron klublari shunday. O'ylaymanki guruhdan chiqishga kuchimiz etadi. Hali hech narsa yo'qotilgani yo'q. Muhimi keyingi uchrashuvlarga yaxshi tayyorgarlik ko'rib, 100 foizli natija qayd etish kerak.


Islombek Rustambekov suhbatlashdi.