Superligadagi debyutida "Nasaf"ni jazolagan, hokimdan mashina olgan hamda Toshkentda ota-onasi ko'z o'ngida gol urgan Rubin Xebay haqida qiziqarli malumotlar

— Xebay 8 yoshidan maydonda to'p tepishni boshlagan. Taip Piraniki uning ilk murabbiyi bo'lib, bo'lajak hujumchining 12 yoshiga qadar saboq bergan.

— Xebay O'zbekiston chempionatida o'ynagan ilk albaniyalik futbolchi hisoblanadi.

— Xebay Albaniyaning 17, 19 va 21 yosh toifalaridagi terma jamoa safida ham harakat qilgan. SHu jumladan, 21 yosh toifasida Maltaga qarshi bahsda dublga erishgan.

— Xebay Albaniya va SHimoliy Makedoniya chempionatida g'olib bo'lgan.

— Hujumchi Transfermarkt tomonidan 400 ming evroga baholangan. 

— "Andijon" tarkibidagi rasmiy debyuti 2023 yilning martida Superliganing 1-turida "Nasaf"ga qarshi o'yinda sodir bo'lgan. O'shanda Xebay Sardor Abdunabiev tomonidan urilgan yagona golga assistentlik qilgan.

— Xebayning "Andijon" safida OKMKga qarshi uchrashuvini tomosha qilish uchun uning ota-onasi Toshkentga tashrif buyurgan. Rubin o'sha o'yinda gol urdi, biroq jamoasi 1:2 hisobida imkoniyatni boy berdi.

— Xebay "Teuta" klubi safida Albaniya chempionati doirasidagi uchrashuvning so'nggi daqiqalarida "Kukesi" darvozasini ishg'ol qiladi. G'alabadan mahrum bo'lgan raqib jamoa xodimlaridan biri esa goldan darg'azab bo'lib, zaxira o'rindig'i tom qismini urib sindirgan. Klub esa buning zararini qoplab berishga majbur bo'lgan.

— "Olimpik"ga qarshi O'zbekiston Superligasi uchrashuvidan keyin Andijon viloyati hokimi SHuhrat Abdurahmonov albaniyalik forvardga avtomobil sovg'a qilgandi.

— O'zPFL talqiniga ko'ra, Xebay 2023 yil Superliganing eng yaxshi futbolchisi deb topildi.

— "Al Oruba" Xebayni "Andijon"dan 300 ming evro evaziga sotib olgandi.

— Xebay 2024 yilni ikki klub safida o'tkazdi: Saudiya Arabistonining "Al Oruba" va Tunisning "Sfaksen". Afrika jamoasini maoshini vaqtida ololmagani tufayli tark etgan.

— "Al Oruba" safida Saudiya Arabistoni Birinchi ligasidagi debyutida 90+5 daqiqada gol urib, jamoasiga muhim g'alaba tuhfa etgan.

— Xebayning sevimli futbolchisi — Krishtianu Ronaldu.

— Xebayning sevimli klubi — tarkibida Krishtianu Ronaldu bo'lgan klub.

— Xebayning sevimli albaniyalik futbolchisi — Bekim Balyay.

— Futboldagi orzusi — Albaniya terma jamoasi azosiga aylanish.

— Uning yoqtirgan taomi — sazan balig'i.

Oqil Abdubarnoev tayyorladi.