Superliga. "Nasaf"ning qoqilishi intrigani qaytaradimi? "Neftchi" uchun ajoyib imkoniyat

Birozdan so'ng boshlanadigan vodiy derbisida ham ochkolar qiymati katta sahnaga chiqadi. 

Chempionlik intrigasi

Chempionlik poygasidagi etakchi “Nasaf” Toshkentda “Bunyodkor”ga qarshi bahsdf o'yindagi ustunlikni saqlab qololmadi va 2:2 hisobidagi durangga rozi bo'ldi. Bu natija — chempionlik ritmiga zarba bo'ldi, raqiblar uchun esa yangi umid eshigini ochdi.

Eng yaqin taqibchi — Farg'onaning “Neftchi” jamoasi endi barcha etiborni o'z qo'liga olmoqda. Agar farg'onaliklar navbatdagi turda vodiy derbisida “Andijon”ni mag'lub etsa, ochkolar orasidagi farq atigi ikkiga qisqaradi. Bu esa chempionlik intrigasini yana qaytarishi, musobaqaga yangi nafas bag'ishlashi mumkin.

Vodiy derbisi — ikki jamoa, ikki yo'nalish

"Andijon" va "Neftchi" o'rtasidagi bahs har doim his-hayajonga boy bo'lgan. Superliga tarixida bu ikki jamoa 52 marta to'qnash kelgan, ustunlik asosan mezbonlar — "Neftchi" tomonida. “Burgutlar” esa oxirgi bor 2016 yilda farg'onaliklarni mag'lub etgan. Keyingi besh bellashuvda “Neftchi” ikki bor g'alaba qozongan, qolgan uch o'yin durang bilan yakunlangan.

So'nggi bahslar natijalari:
09.05.2025 — "Andijon" 0:2 "Neftchi"
25.09.2024 — "Andijon" 0:0 "Neftchi"
12.05.2024 — "Neftchi" 2:2 "Andijon"
31.08.2023 — "Neftchi" 0:0 "Andijon"
08.04.2023 — "Andijon" 0:2 "Neftchi"

Taqvim va kurash manzarasi

"Andijon" hali Superligada qolish masalasini to'liq hal qilmagan. Ustama ravishda OCHL-2 bahslari ham ularning yukini og'irlashtiradi. Jamoa oktyabr oyini “Surxon” va “Sho'rtan”ga qarshi muhim uchrashuvlar bilan yakunlaydi.

“Neftchi” esa OKMK va pastdagi jamoalar — “Sho'rtan”, “Surxon”, “Buxoro”ga qarshi maydonga tushadi. Agar ular bu seriyada barcha uchrashuvlarda g'alaba qozona olsa, “Nasaf”ni jiddiy bosim kutmoqda.

Xulosa

Superligada chempionlik poygasi yana qiziy boshladi. “Nasaf”ning bitta qoqilishi butun mavsum manzarasini o'zgartirishi mumkin. Bu orada “Neftchi”ning ruhiy ustunligi va qulay taqvimi intrigadan umid qilishga asos beradi. Ammo musobaqa so'nggi metriga yaqinlashar ekan, barcha narsa faqat jamoalarning maydondagi javobida aniqlanadi. Hozircha eng muhim savol ochiq: “Neftchi” bu imkoniyatdan foydalana oladimi yoki “Nasaf” yana o'z kuchini namoyon etadimi?