Superliga klublari yuzasidan O'FA rahbariyatiga murojaat!

Hakamlik, kelishilgan o'yinlar va hokazo yuzasidan O'FA amalga oshirayotgan ishlar tahsinga loyiq. Lekin shunga qaramasdan davlat tomonidan moliyalashtiriladigan klublar rivojlanish yo'lidan yurish o'rniga boshqaruvdagilarning manfaatiga xizmat qilib kelmoqda. Hech bir Superliga klubi hozircha zamonaviy tendenciyalarga javob berish tugul, ularga intilish borasida ham maqtana olmaydi. Maqsadsiz o'tkazayotgan mavsumi uchun javobgarlik hissi yo'q klublarimiz bunday muhitga o'rganib qolishgan, afsuski.

Klublardagi bosh direktor lavozimi qog'ozda jarangli eshitilishi mumkin, lekin amalda Superliga klublarida bosh direktor jamoaga vazifa yoki talab qo'yishga qodir emas. Sir emaski, o'zbek futbolida bosh murabbiylar nafaqat jamoa ustidan hukmronlik qiladi, balki klubga yo'naltirilayotgan pullarning taqsimotining nazoratini ham o'z qo'liga olgan. Bu esa rivojlanmayotgan klublarimizning tobora tubga qarab ketishiga zamin yaratmoqda. CHunki bosh murabbiy uchun asosiy jamoadan boshqa bo'g'in yo'q va qolganlar eng pastki darajada. Bu ham o'zbek futbolidagi eng katta muammolarimizning asoslaridan biri.

SHu boisdan ham O'FA rahbariyatidan FIFA kunlari tufayli bo'ladigan tanaffus paytida Superliga klublarining xo'jayinlari, tasischi yoki klub prezidentlari ishtirokida ochiq muloqot shaklida jurnalistlar bilan uchrashuv tashkil etib berishlarini so'rab qolamiz.

Narzulla Saydullaev