Superliga. Bugun "Lokomotiv"da Toshkent derbisi, "Metallurg" Namanganda, "Qo'qon-1912" Termizda mehmon

SURXON – QO'QON-1912
19 oktyabr 2020 yil. Termiz. "Surxon" stadioni. 16:00
Hakamlar: Ilgiz Tantashev, Husniddin SHodmonov, SHavkat Rahmatov, Ahmadjon Ergashev
Nazoratchi: Rashid Aytekov
Komissar: Oybek Yunusov

Bu ikki jamoa O'zbekiston chempionatida hozirga qadar 19 marta to'qnash kelishgan. Natijalar mutlaqo teng: 9 bor "Qo'qon-1912", 9 marta "Surxon" g'olib bo'lgan. Bitta uchrashuvda durang qayd etilgan. Qizig'i o'zaro o'yinlarda ikkala jamoa ham 32tadan gol urgan.

"Surxon" maydonida o'tgan 9ta o'yinning ikkitasida "Qo'qon-1912" g'alabaga erishgan. So'nggi bor qo'qonliklar 1999 yilgi mavsumda safarda bu jamoani mag'lub etishgan.

Birinchi davrada Qo'qonda o'tgan bahsda Baxtiyor Ashurmatov shogirdlari 3:0 hisobida g'alaba qozonishgan.

LOKOMOTIV – BUNYODKOR
19 oktyabr 2020 yil. Toshkent. "Lokomotiv" stadioni. 18:00 ("Sport TV" LIVE)
Hakamlar: Firdavs Norsafarov, Olim Abduvosilov, Ruslan Serazitdinov, Ilya Ilin
Nazoratchi: Vladislav Ceytlin
Komissar: Laziz Qo'chqorov

Toshkentning bu ikki jamoasi O'zbekiston chempionatida hozirgacha 27 marta o'zaro o'yin o'tkazgan. Kichik ustunlik "qaldirg'ochlar" tomonida. 10ta bahsda "Bunyodkor" zafar quchgan, 9ta uchrashuvda "temiryo'lchilar"ning qo'li baland kelgan. Yana 8ta o'yinda durang qayd etilgan. O'zaro o'yinlarda "Bunyodkor" 36ta, "Lokomotiv" 32ta gol urgan.

O'zaro oxirgi 4ta o'yinda "Lokomotiv" bu raqibni umuman mag'lub eta olmagan - 3ta durang, 1ta mag'lubiyat.

Agar faqat "Lokomotiv" mezbon bo'lgan o'yinlarni hisobga olsak, oxirgi olti o'yinda "Bunyodkor" safarda g'alaba qozona olmagan - 2ta durang, 4ta mag'lubiyat. So'nggi bor "Lokomotiv" bu jamoaga o'z maydonida 2014 yilgi mavsumda mag'lub bo'lgan.

Birinchi davrada "Bunyodkor" mezbonligi ostida o'tgan bahsda Vadim Abramov jamoasi 2:0 hisobida g'olib bo'lgan.

NAVBAHOR – METALLURG
19 oktyabr 2020 yil. Namangan. "Markaziy" stadion. 18:00 ("Dunyo bo'ylab" LIVE)
Hakamlar: Jasur Muxtorov, Abduhamidullo Rasulov, Aleksandr Sidorov, To'rabek Suyunov
Nazoratchi: Mamur Saidqosimov
Komissar: Bekzod Aripov.

Bu ikki klub o'zaro 47ta o'yin o'tkazishgan. Ustunlik vodiy klubi tomonida. "Navbahor" 21ta uchrashuvda g'olib bo'lgan. 13ta bahsda "Metallurg" 3 ochko egasiga aylangan. Qolgan 13ta o'yinda durang kuzatilgan. O'zaro o'yinlarda "Navbahor" 68ta gol urgan, "Metallurg" hisobida 48ta gol mavjud.

"Navbahor" o'z maydonidagi oxirgi 4ta o'yinda "Metallurg"ga umuman yutqazmagan - 2ta g'alaba, 2ta durang. So'nggi ikki mavsum Namanganda bu jamoalar o'rtasidagi ikkala o'yinda ham 0:0 hisobida qayd etilgan. "Metallurg" faqat bir marta 2016 yilgi mavsumda Namangandan g'alaba bilan qaytgan.

Birinchi davrada Bekobodda o'tgan bahsda "Navbahor" 3:1 hisobida g'alaba qozongan edi.