Superliga-2025. Jasur Hasanov, Suhrob Sultonov, Artyom Filiposyan, Aleksandr Lobanov hech qaysi klub qaydnomasiga kirmadi
04 mar 2025 14:37
Yangiliklar

Superliga-2025. Jasur Hasanov, Suhrob Sultonov, Artyom Filiposyan, Aleksandr Lobanov hech qaysi klub qaydnomasiga kirmadi

O'zPFL Superliga jamoalarining yangi mavsum uchun qaydnomasini navbati bilan elon qilib bormoqda.

Jamoalar tarkibiga nazar tashlar ekanmiz, bir qator tajribali nomdor futbolchilar yo'qligiga guvoh bo'lishimiz mumkin. Xususan, o'tgan mavsumda "Buxoro" bilan Superligaga yo'llanma olgan Jasur Hasanov bu yil Superliganing hech bir jamoasining qaydnomasidan o'rin olgani yo'q. Malumot uchun, bu yio 42 yoshga to'ladigan Hasanov faoliyati davomida "So'g'diyona", "Navbahor", "Mashal", "Bunyodkor", "Lokomotiv", "Qizilqum", "Nasaf", OKMK, "Buxoro" jamoalarida to'p tepgan.

2024 yilda "temiryo'lchilar" darvozasini qo'riqlagan Suhrob Sultonov ham bu mavsumda Superliga jamoalari yig'inlarida ko'rinish bermadi. Suhrob Sultonov Superligada "Metallurg", OKMK, "Bunyodkor" jamoalari sharafini himoya qilgan.

"Qizilqum"ning sodiq futbolchilari Fayzulla Qambarov va Azizbek Usmonov ham mavsumni elitada boshlamaydigan bo'ldi. Ushbu ikki futbolchi 2013 yildan buyon navoiyliklar libosida harakat qilib kelayotgan edi. Usmonov 2018 yil malum vaqt "Surxon"da to'p tepgan va yana "Qizilqum"ga qaytgan.

Tajribali markaziy himoyachi Artyom Filiposyan o'tgan mavsumni Hasanov kabi Buxoroda o'tkazdi va jamoa bilan Superliga chiptasini qo'lga kiritdi. Ammo futbolchi biron jamoa bilan shartnoma imzolamadi.

So'nggi ikki mavsumda katta futboldan uzoqda yurgan Sherzod Azamov katta ehtimol bilan butsalarini mixga ilgan bo'lishi mumkin. Futbolchi Superligada oxirgi marotaba 2022 yil oktyabr oyida "Paxtakor" tarkibida "Nasaf"ga qarshi maydonga tushgan edi. Shundan buyon uni yashil maydonda ko'rganimiz yo'q.

Darvozabon Aleksandr Lobanov 2024 yilning yozgi transferlar oynasida "Navbahor" safini tark etgan edi. Kiperni esa 2025 yil Superliganing dastlabki davrasida ko'rmaymiz. U hech bir jamoa safiga qo'shilgani yo'q.

"Metallurg", "Bunyodkor", OKMK jamoalaridagi faoliyati bilan tanilgan Murodjon Toshmatov va Mirg'iyos Sulaymonov Superliga jamoalari bilan shartnoma imzolamadi. Sulaymonov 2024 yilning birinchi davrasini Bekobodda, Toshmatov esa Olmaliqda o'tkazgandi.