Suhrob Berdiev: "Borussiya Dortmund"ga o'xshatish? Men uchun "Andijon" muxlislari yagona"

"Burgutlar" endilikda "Metallurg" mehmoni bo'lishadi. Mazkur uchrashuv oldidan vodiy derbisining bosh qahramoni, "Andijon"ga g'alaba keltirgan gol muallifi Suhrob Berdievning fikrlarini tingladik. 

- "Andijon"ning so'nggi daqiqalarda hujumga o'tishi tavakkal qilingan harakatlar mahsulimi yoki aniq o'ylangan reja edimi?

- Avvalambor barcha muxlislarimizni g'alaba bilan tabriklayman. Bu bilan to'xtab qolish niyatida emasmiz. CHunki oldimizda muhim uchrashuv kutmoqda. "Navbahor" bilan uchrashuvga to'xtalsam, o'yin tempi yuqori edi. CHunki vodiy derbisi doim shunday shiddatli o'tgan. O'yin so'ngida bor tempni yanada oshirib yakunda g'alabani o'z tomonimizga og'dira oldik. CHunki to'p bizda edi, vaziyatlar ham ko'proq yaratdik. Qolaversa, muxlislar ham qo'llab-quvvatlab bizni yanada oldinga borishimizga sababchi bo'la olishdi. Oldinga o'tishimiz tavakkal emasdi. Muhimi Andijon xalqi oldida yuzimiz yorug' bo'ldi. 

- Umuman o'yindan keyin xulosalar qanday bo'ldi?

- Nafaqat "Navbahor" balki boshqa vodiy jamoalariga qarshi derbilar ham qiziqarligi bilan yodda qolgan. Xulosalar ijobiy. Ayniqsa goldan keyin. Akrobatikmi yoki boshqacha bunisi ahamiyatsiz. Eng muhimi barcha xursand. Jamoa esa uch ochko oldi. Agarda chiroyli gol ursangiz-u, buni jamoaga foydasi bo'lmasa u o'z ahamiyatini yo'qotadi. 

- "Andijon" Superliganing etakchilaridan ochko olishni maromiga etkazmoqda. Aytingchi, jamoa joriy mavsumda o'z darajasidan baland harakat qilyaptimi?

- To'g'ri ko'p jamoalarga bosh og'riq bo'la olyapmiz. Biz har bir o'yinga maksimal darajada tayyorgarlik ko'ramiz. O'z o'ylagan rejalarimizni amalga oshirishga harakat qilamiz. Tarixda natija qoladi. Biz bu natijalar uchun yil boshidan buyon mehnat qilib kelyapmiz. Bundan keyin o'z darajamizdan ham kuchliroq o'yin ko'rsatishimiz va kerakli natijalarga erishishimiz lozim. 

- Nazariy jihatdan olib qaralganda "Andijon"da mavsumni sovrindorlar qatorida yakunlash imkoniyati saqlanib qolingan. Jamoaning ayni paytdagi egallab turgan o'rni qoniqarlimi?

- Xudo xohlasa, imkoniyatlarimizdan foydalanib mavsumni yuqoriroq o'rinda yakunlashga borimizni beramiz. 

- "Andijon" stadionidagi muhitni ko'rganingizda Evropadagi qaysi jamoa uchrashuvlarini eslatadi?

- Muxlislarga katta rahmat aytaman. Ko'pchilik "Borussiya Dortmund"ga qiyoslaydi, lekin men uchun "Andijon" muxlislari yagona.

- Andijonga kelish navbati OKMK va "Paxtakor"ga. "Andijon" yana kutilmagan natijalar qayd etishga tayyormi?

- OKMK va "Paxtakor"ga qarshi uchrashuvlar haqida gapirishdan oldin "Metallurg"ni yutib olishni o'ylashimiz kerak. Murabbiylarning bu borada o'z rejasi bor.