Siz "kashfiyot" deganda nimani tushunasiz?

Nominaciyalar va ularga taqdim etilgan nomzodlar ham bosqichma-bosqich elon qilinmoqda.

Mavsum yakuniga bitta tur qoldi, va bu so'nggi tur mantiqan deyarli hech narsani o'zgartirmaydi. Demak, musobaqa o'tkazadigan tashkilotning bu bosqichida asosiy diqqati – mavsumda eng yaxshi natija ko'rsatganlarni taqdirlashga qaratilgan. Shu joyda meni o'ylantirayotgan muhim savol paydo bo'ldi: PFL tomonidan joriy etilgan “Yil javohiri” va “Yil kashfiyoti” nominaciyalari qanday mezonlarga asoslangan?

“Yil javohiri”: eng yaxshi yosh futbolchi

Ushbu nominaciyaga quyidagi futbolchilar taqdim etilgan:

* Behruzjon Karimov — 13 o'yin, 3 gol, 879 daqiqa

* Sardor Bahromov — 21 o'yin, 1 gol, 971 daqiqa

* G'anisher Qodirov — 13 o'yin, 3 gol, 1 assist, 530 daqiqa

* Oybek O'rmonjonov — 27 o'yin, 4 gol, 3 assist, 1486 daqiqa

Bu erda etirozga o'rin yo'q. Nomzodlar yosh toifasiga mos, o'ziga xos natija ko'rsatgan va o'sish uchun katta salohiyatga ega futbolchilar. Demak, bu nominaciya o'z o'rnida.

“Yil kashfiyoti”: mezon qanaqa?

PFL yana bir nominaciya – “Yil kashfiyoti”ni elon qildi. Unda quyidagi futbolchilar bor:

* Abbos G'ulomov — 29 o'yin, 10 gol, 2 assist, 2280 daqiqa

* Nosirjon Abdusalomov — 21 o'yin, 3 gol, 6 assist, 1247 daqiqa

* Muhammadrasul Abdumajidov — 22 o'yin, 1 assist, 1957 daqiqa

* Jahongir O'rozov — 27 o'yin, 1 assist, 2430 daqiqa

* Javohir Ro'ziev — 27 o'yin, 1 gol, 1887 daqiqa

* Rustam Turdimo'radov — 29 o'yin, 7 gol, 2 assist, 2219 daqiqa

* Nodirbek Abdurazzoqov — 29 o'yin, 6 gol, 2 assist, 1880 daqiqa

* Amir To'raqulov — 24 o'yin, 3 gol, 1 assist, 1286 daqiqa

Endilikda savol tug'iladi: “kashfiyot” deganda nimani tushunishimiz kerak?

Futbolda bu atama odatda quyidagi manoda ishlatiladi:

* oldingi mavsumlarda ko'zga tashlanmagan,

* kam o'ynagan yoki umuman nomalum bo'lgan,

* shu mavsumda porlab chiqib, keng omma etiboriga tushgan futbolchi.

Ammo ro'yxatga nazar tashlasak, barcha nomzodlar bu mezonga to'liq mos kelavermaydi.

Masalan:

Abbos G'ulomov — 2019 yilning o'zida Superligada debyut qilgan. Allaqachon tanilgan futbolchi, bu yilgi o'yini — kashfiyot emas, ko'p yosh futbolchilar uchun o'rnak desak to'g'riroq.

Jahongir O'rozovni ham yangi deb bo'lmaydi. 2022 yildan buyon Superligada to'p tepayotgan futbolchi.Orada Turkiyada ham o'ynab keldi.  2023 yil U-20 Osiyo Kubogi va Jahon chempionatida ham ko'zga tashlangan.

Rustam Turdimurodov — o'tgan yil “Andijon”da yaxshi o'ynab, avvalroq mahalliy futbol muxlislari tomonidan kashfiyot sifatida qabul qilingan.

Nodirbek Abdurazzoqov va Amir To'raqulov ham mutlaqo yangi nomlar emas. Ular 2–3 mavsumdir maydonda.

Ana shu nuqtada ushbu nominaciyaning tanlash tamoyillari noaniq ko'rinadi.

Qaysi futbolchilar chin manoda kashfiyot bo'lishi mumkin?

Agar so'z haqiqiy “kashfiyot” haqida ketsa, nomzodlar orasida quyidagilar mezonga mosroq:

* Nosirjon Abdusalomov

* Muhammadrasul Abdumajidov

* Javohir Ro'ziev

Bu yigitlar haqida futbol jamoatchiligi aynan 2025 yilda keng tanidi. Ular shu mavsum maydonda o'zini ko'rsatdi. Agar haqiqatdan "kashfiyot" sifatida ko'rsatilsa deylik o'tgan yili Anvar Hojimirzaevni "Dinamo"dagi o'yinlari orqali barcha tanidi. 

Xulosa

PFL yil yakunlanmasdan harakatni boshladi — bu quvonarli. Biroq nominaciya tanlashda qoidalar yanada aniq, mezonlar esa ochiq bo'lsa, nafaqat muxlislar, balki futbolchilarning o'zi uchun ham tushunarli bo'lardi.

Shunchaki yaxshi o'ynagan emas, aynan:

* kim porlab chiqdi,

* kim tasavvurlarni o'zgartirdi,

* kimni futbol olami endi kashf qildi —

ana shu savollarga javob olish “kashfiyot” nominaciyasining haqiqiy mohiyatidir. Lekin boshqa tomoni ham borki bu erda six ham, kabob ham kuymasin, hech kim hafa bo'lib qolmasin degan omillar hisobga olingan bo'lsa kerak. 

Abdulaziz Iskandarov

P.S: Muallif fikri tahririyat fikrini ifodalamaydi