SHukurali Po'latov: "Neftchi"da qolishim borasida hech narsa deya olmayman

SHartnomasi tugagan futbolchilardan biri SHukurali Po'latovga sim qoqib, yangiliklarni bilishga qiziqdik.

- SHukurali, "Neftchi" hammadan birinchi mavsum taraddudini boshladi. Tatil davomida charchoqlar chiqarilgandir?
- Ha, kechadan mashg'ulotlarga kirishildi. Bugundan boshlab kuniga ikki mahaldan shug'ullanmoqdamiz. Hozircha hammasi yaxshi.

- Oxirgi paytlarda jamoangiz haqida ko'p gapirilmoqda. Emishki "Neftchi"ning ko'plab etakchilari kelgusi taqdirini boshqa klublar bilan bog'lamoqchi?
- Ha, biz ham bu haqda internet saytlarida o'qib turibmiz. Bilasizmi, "Neftchi" bilan amaldagi shartnomasi poyoniga etgan futbolchilar soni ko'pchilikni tashkil etadi. Har bir inson o'sishga erishishni istaganidek, etakchi o'yinchilar grand klublardan kelib tushayotgan takliflarni ko'rib chiqishmoqda. Kim qoladi, kim ketadi? Bu haqda hozir sizga tayinli bir gap aytishim qiyin.

- SHaxsan sizning ham poytaxt klublaridan biriga o'tishingiz xususida gap so'zlar urchiy boshladi. Sizning ham klub bilan kelishuvingiz yakunlandimi?
- Ha, hozirda erkin agentman. Takliflar ham yo'q emas.

-  U xolda aytingchi, kelgusi taqdiringizni qaysi jamoa bilan bog'lamoqchisiz?
- "Neftchi"da qolamanmi, yoki yo'qmi bu yaqin kunlarda aniq bo'ladi. Hozircha hech nima deya olmayman. CHunki hozirgi jamoam ham shartnomani uzaytirish taklifi bilan chiqqan.

- Tajribali Mansur Saidovning klubdan ketayotganini eishitdik. Bu haqda qanday fikrdasiz?
- Saidov so'zsiz jamoamiz etakchisi edi. Futbolchilarni o'z ortidan ergashtira olardi. Qisqa qilib aytganda, haqiqiy sardor edi! Nima ham derdik, Mansur aka keyingi mavsumni OCHLda ishtirok etadigan klublarimizning birida o'ynashga yaqin turibdi. Yuqorida aytganimdek, har bir futbolchi grand klublar safida o'ynashni istaydi va shu orqali terma jamoa sharafini himoya qilishni xohlaydi.

- Aytishlaricha, G'ulom O'runov, Mirzakamol Kamolov, Zayniddin Tojiev kabi o'yinchilar dastlabki yig'inga kelishmagan?
- To'g'ri, ikkinchi davrada yangi kelib qo'shilgan futbolchilarning deyarli barchasi negadir yig'inga kelishmadi. Asosan oldingi o'yinchilar bor xolos. SHuningdek "So'g'diyona"dan (Maruf Murodov) va "Istiqlol"dan (G'ulomhaydar G'ulomov) kelgan yangilar bor.

Islombek Rustambekov suhbatlashdi