SHukurali Po'latov: “Jamoamizda g'alabaga bo'lgan ishonch yuqori”

Bahsdan avval “Neftchi” futbolchisi SHukurali Po'latov o'z fikrlari bilan o'rtoqlashdi. Markaziy himoyachi navbatdagi derbi oldidan munosabat bildirar ekan, “Neftchi” jamoasiga g'alaba suv va havodek zarur ekanligini aytib o'tdi.

- O'tgan yili o'z maydonimizda kutilmaganda Qo'qon jamoasiga mag'lub bo'lgandik. Ochig'i, o'sha bahsda omadimiz kelmagandi. Qo'qonliklarni hurmat qilamiz. Sergey Kovshov qo'l ostida ajoyib jamoa shakllangan. Biroq biz derbida faqat g'alaba uchun maydonga chiqamiz. Jamoamiz “Qo'qon-1912”ga qarshi o'yinga jiddiy tayyorgarlik ko'rdi. Ayniqsa “Paxtakor” ustidan qozonilgan g'alabadan so'ng yigitlarni o'ziga bo'lgan ishonchi ortdi. Bu esa juda muhimdir. So'nggi bahslarda ishqibozlar tashrifining keskin pasayib ketishiga guvohi bo'lyapmiz. O'tgan turdagi muvaffaqiyatdan so'ng yana muxlislarimiz stadionga qaytishadi deb umid qilaman va jamoa vakili sifatida esa barcha farg'onaliklarni “Istiqlol” stadioniga chorlayman, - dedi Po'latov.

“Murabbiyimiz Murod Ismoilovni jamoamizga qaytgani faqat  foydamizga ishladi deb hisoblayman. Murod Muzaffarovich bosh murabbiyimiz Andrey Fyodorov bilan bir-birlarini juda yaxshi tushunib ishlashadi va jamoani o'yinlarga jiddiy xozirlashadi, - deb qo'shimcha qildi 26 yoshli futbolchi.

Eslatib o'tamiz, “Neftchi” – “Qo'qon-1912” o'yini bugun “Istiqlol” stadionida bo'lib o'tadi.   

“Neftchi” matbuot xizmati