"SHo'rtan": Stadionda boshlangan bayram, hali davom etadi

Butun mavsum davomida stadionga tashrif buyurgan va sevimli futbolchilarini har tomonlama qo'llab-quvvatlab turgan fidoiy muxlislar so'nggi tur uchrashuviga ham bayramona ruhda tashrif buyurishdi. Bu safar ham SHo'rtan jamoasi g'uzorliklarga g'alaba shodiyonasini taqdim etishdi va o'z hisoblariga rekord darajadagi – 77ta ochkoni yozib qo'yishdi. Navbatdagi uchrashuvda ham o'zining to'purarlik qobiliyatini namoyish etgan tajribali hujumchi Viktor Klishin esa mavsumdagi 40-golini darvozaga kiritishga muvaffaq bo'ldi.  

Uchrashuv yakuniga etgach, stadionda katta bayramning nishonasi boshlab yuborildi. Har ikkala jamoa vakillari hamda hakamlar guruhi muxlislar oldida saf tortishdi. Qashqadaryo viloyati G'uzor tumani hokimi, Oliy Majlis senatori, tuman futbol federaciyasi prezidenti Donaev SHomurod Xolboevich futbol bo'yicha 2014 yilgi O'zbekiston birinchiligi bahslarida muddatidan oldin - ham Oliy liga yo'llanmasi, ham musobaqa chempionligini qo'lga kiritgan SHo'rtan jamoasi, klub rahbariyati, xodimlar, murabbiylar guruhi, futbolchilar va muxlislarni qutladi. G'uzor jamoasi mamlakat futbolida o'z o'rni va obro'siga ega ekanligini takidlagan SH.Donaev, yangi – 2015 yilgi futbol mavsumida ham SHo'rtan jamoasining oldiga kuchlilar safida chiroyli va mazmunli o'yinlar namoyish etib, ajoyib g'alabalarni qo'lga kiritib, muxlislarni quvontirish kabi maqsadlar qo'yilganligini aytib o'tdi.

SHundan so'ng, SHo'rtanni 2014 yilgi futbol mavsumida katta g'alabaga etaklab kelgan bosh murabbiy Muxtor Qurbonov, shuningdek boshqaruv va tashkiliy ishlarda jonbozlik ko'rsatgan klub Bosh direktori Oblayor Rasulovlar o'zbekona urf-odatlarimizga ko'ra G'uzor tumani hokimligining qimmatbaho sovg'alari – zarbof to'n, belbog' va do'ppi bilan taqdirlanishdi.

Har ikkala jamoa sardorlari esa davlatimiz madhiyasi sadosi ostida 2014 yilgi birinchilik bayrog'ini tushirishdi.

Biz yuqoridagi maqolamizga STADIONDA BOSHLANGAN BAYRAM, HALI DAVOM ETADI sarlavhasini bejizga tanlamadik. Gap shundaki, 2014 yilgi O'zbekiston birinchiligida chempionlikni qo'lga kiritgan jamoamiz azolarini munosib taqdirlash va ularga bayram dasturxoni tashkil qilish klub rahbariyatining rejasida bor. Demak, SHo'rtan uchun hozircha mavsum to'liq yakuniga etgan emas...