SHerali Boboqulov: "Bugun biz g'alaba qozonishimiz ham mumkin edi"

Matbuot anjumanida dastlab “Metallurg W” jamoasi bosh murabbiyi SHerali Boboqulov o'z fikrlarini bildirib o'tdi.

SHerali Boboqulov:

- Bugungi uchrashuv juda muhim uchrashuv edi. O'ylaymanki, bahs teng kurashlar ostida o'tdi. Dastlabki daqiqalardagi imkoniyatdan foydalanganimizda bugun g'alaba qozonishimiz ham mumkin edi.

- Jamoaning mahoratiga qoyil qoldik. Ancha tajribali bo'lgan “Sevinch” jamoasi bilan teng o'yin ko'rsatishdi. Oldingi o'yindagi yirik mag'lubiyatni qanday izohlaysiz?
- Biz o'z stadionimizda ham yomon o'ynamagandik. Faqat ikki bor darvozabonimizning yo'l qo'ygan qo'pol xatolari yakunda yirik mag'lubiyatimizga sabab bo'lgandi. SHuningdek o'z muxlislarimiz ko'z o'ngida ortiqcha bosim ostida to'p surgandik. Biz ruhiy bosimni ko'tarolmadik.

- Maxfuza Turopova o'tgan mavsum “Sevinch” jamoasi tarkibida chiroyli o'yinlari bilan tanilgandi. Bugun u “Metallurg-” tarkibida yaxshi o'ynay olmadi.
- Maxfuza o'tgan mavsum davralar oralig'ida jarohat olib mavsum oxirigacha futbol o'ynay olmagandi. Bugun u maydonda harakat qilgan bo'lsa-da to'la sog'ayib ketmagan. Biz uning tajribasiga suyangan holda bugun maydonga tushirishga tavakkal qildik.

- Nargiza Abdurasulovani nega zaxiraga oldingiz?
- Rejamizda uni ertaroq almashtirish turgandi. Sababi uning o'rniga tushgan futbolchi ham tezkor ham o'z texnikasiga ega yosh futbolchi hisoblanadi. Bizga bugun Nargiza o'z tajribasi bilan yordam berishiga umid qilgandik.