SHavkat Saidov: "Metallurg"ning maksimum vazifasi 6-o'rinni egallash"

“CHempionatning birinchi turi hamisha qiyin kechadi. Ayniqsa talabchan muxlislar qarshisida o'ynash og'ir. Biz bu o'yinga jiddiy hozirlik ko'rgandik. O'zlaringiz shohidi bo'ldingiz, butun o'yin davomida “Metallurg” katta ustunlikka ega bo'ldi. Barcha vaziyatlardan foydalanganimizda yirik hisobda zafar quchardik. Ammo yoshlarimizdagi tajribasizlik, birinchi o'yindagi hayajon vaziyatlardan foydalanishda o'yinchilarimizga xalaqit berdi.

Mavsumga tayyorgarlik jarayonida jamoamizda katta o'zgarishlar bo'ldi. klubni tark etganlar o'rni yosh, iqtidorli o'yinchilar bilan to'ldirildi. Ular kelgusi o'yinlarda albatta o'zlarini ko'rsatishlariga ishonaman. Buning uchun biroz vaqt kerak.

Bugungi o'yinda barcha yigitlarimizdagi g'alabaga bo'lgan ishtiyoqini alohida etirof etgan bo'lardim. Klub mutassaddilari tomonidan jamoaga barcha shart-sharoitlar yaratib berilmoqda. O'tgan yilgi hisob-kitob ishlari o'z vaqtida bajarildi. Yangi mavsum arafasida ham qarzdorlik yo'q. SHunday ekan, muassislarimiz, muxlislarimiz ishonchini oqlash uchun faqatgina o'ynashimiz, kerakli natijalarni ko'rsatishimiz lozim.

Yangi mavsumdagi vazifa? Birinchi navbatda o'z uyimizdagi barcha o'yinlarda chiroyli, hujumkor o'yinlarimiz bilan muxlislarimizni xursand etish, g'alaba qozonishdir. Safar o'yinlarida ham imkon darajasida ochko jamg'arishga harakat qilamiz. Maksimum vazifa kuchli oltitalikka kirish, minimum natija o'ntalikdan tushib ketmaslik”, - deydi SHavkat Saidov. 

"Metallurg" matbuot xizmati saytimiz uchun maxsus