SHaker Zuagi o'z golini nega stul atrofida nishonladi?

Sardor Rashidov, Temur Ayupov va Sardor Sobirxo'jaevning gollaridan so'ng “qaldirg'ochlar”ning to'rtinchi goliga SHaker Zuagi mualliflik qildi. Tunislik yarim himoyachi o'z golini noodatiy tarzda nishonladi. Yani u maydon tashqarisida o'tirgan betaraf shifokorlar stulini maydonga yaqin joyga olib kelib, jamoadoshlari bilan uning atrofida aylangan holda nishonladi. Ushbu holat ko'pchilikda qiziqtirib qo'ydi. Gol nega aynan shunday nishonlanganini futbolchining o'ziga murojaat etgan holda bilib oldik.

- “Mashal”ga qarshi o'yindan bir kun avval ruhshunos biz bilan mashg'ulot o'tkazdi. Bir soat davom etgan nazariy mashg'ulotda ruhshunosning bir gapi nafaqat menga balki boshqa jamoadoshlarimga ham tasir qildi. Yani inson o'z kuchiga ishonishi uchun bir joyda muqim o'rnashishi va o'z ishini mukammal bajarishda davom ettirishi lozim ekan. Ruhshunosning ushbu gapidan keyinoq jamoadoshlarimga agar ertaga gol ursam stul atrofida aylanib, nishonlaymiz degandim. So'nggi o'yinlardagi muvaffaqiyatsizliklardan keyin o'z kuchimizga yana ishona boshladik. O'ylaymanki, noxush kunlarimiz ortda qoldi. Bundan buyog'iga g'alabalar qozonib, muxlislarimizni xursand etishimiz va musobaqa jadvalida yuqoriroqqa ko'tarilishimiz kerak, - deydi SHaker Zuagi.