Sarvar Karimov: "Darvozabon har qanday holatga tayyor turishi kerak. Gohida yillab zaxirada qolib ketishi mumkin"

Qiziqarli va murosasiz kechgan uchrashuvda Farrux Ikromovning yagona goli mezbonlarga g'alaba keltirdi. O'yinning qolgan daqiqalarida darvozabon Sarvar Karimov jamoasini muqarrar gollardan qutqarib yutuqqa munosib hissasini qo'shdi, deya olamiz. Ushbu uchrashuvdan so'ng mahoratli kiperning fikrlari bilan qiziqdik.

"Kubok bahsi bitta o'yindan iborat ekanligi bois masuliyatni his qilib turgandik. "Navbahor" bilan bahsga qattiq tayyorgarlik ko'rganimiz samara berdi, deb o'ylayman. Mashg'ulotlarda barcha birdek mehnat qildi. Mehnatlarimiz zoe ketmaganidan xursandmiz. Muxlislarni keyingi bosqich yo'llanmasi bilan tabriklayman. Ancha vaqtdan so'ng o'z maydonimizga qaytdik. Qaytishimiz g'alabali yakunlandi. 

Bevosita o'yinga to'xtaladigan bo'lsak, ikki xil taym guvohiga aylandik. Birinchi bo'limda biz, ikkinchi bo'limda "Navbahor" ustunlikka ega bo'ldi. Agarda hisobdan kelib chiqadigan bo'lsak raqib bosimni oshirishi tabiiy hol edi. 

Joriy mavsumdagi ilk o'yinimni "Mashal"ga qarshi zixiradan maydonga tushganda o'tkazdim. SHundan so'ng murabbiylar menga ishonch bildirishmoqda. Darvozabonning taqdiri shu. Kerak bo'lsa, yillab zaxirada qolishi mumkin. SHunday ekan har qanday vaziyatga tayyor turish kerak",- deydi Sarvar Karimov.