Sanjar Tursunov: "Asosiy maqsadimiz - natija"

"Filippin bilan o'yinda maydonga tushmagan bo'lsamda, g'alaba qozondik. Asosiy maqsadimiz - natija. U men bilan erishiladimi yoki mensiz, bu katta ahamiyatga ega emas. Bilasiz, futbolchi uchun o'z manfaatlari emas, jamoa manfaati birinchi o'rinda turadi. Biz O'zbekiston nomidan ishtirok etmoqdamiz", - deydi Tursunov.

- Sizni ham terma jamoaning fahriy futbolchilaridan biri deb hisoblasak bo'ladi. SHuni hisobga olgan holda qanotda o'ynagan Eldor SHomurodovning o'tgan o'yindagi harakatlariga qanday baho bera olasiz?

-  Eldor so'nggi o'yinlarni yaxshi o'tkazdi. "Bunyodkor"dagi o'yinlarini hali ko'rganim yo'q. Lekin, u o'sha kuni bundan ham yaxshiroq o'ynay olishi mumkin edi. Hali yosh, muhimi xatolari ustida ishlashi va olg'a intilishi kerak.

- Filippinga qarshi o'yinda raqib darvozabonining ajoyib o'yinlarini hisobga olmasak, bizga nima etishmadi?

- Biz o'sha kuni ko'plab zarba berdik. Statistikani ham ko'tarsak, o'yin davomida 40ga yaqin vaziyatni yaratibmiz. Raqib posbonining ham hizmati katta bo'ldi. Agar ertaga shu o'yinimiz chiqsa, hisob ham muxlislarga yoqadigan holatda bo'lishi mumkin.

- Ertangi o'yin bizdan ko'ra Bahraynga muhimroq. CHunki ular Osiyo CHempionati yo'llanmasi uchun ham kurashadilar. Ertaga raqibdan qanday o'yin kutyapsiz?

- O'ylashimcha, o'yin biz uchun ham muhimroq. CHunki, guruhda birinchi o'rinni olmoqchimiz. Muxlislarimiz oldida faqat va faqat g'alaba uchun o'ynamoqchimiz.