Sanjar Asqaraliev: “Maqsadimiz g'alaba qozonish”

Bu safargi qarama-qarshilikni ham keskin tarzda o'tishiga shubha yo'q. Har ikki jamoa azolari ham 8-turda raqiblariga imkoniyatni boy berishgani uchun maydonga faqat g'alabani ko'zlab tushishlarini ehtimoli yuqori. “Navbahor”ni zimmasidagi masuliyat yuki raqibnikiga qaraganda og'irroq. Sababi, “lochinlar” mamlakat kubogining nimchorak final dastlabki bahsida Namanganda Ismoilov shogirdlariga 0:1 hisobida imkoniyatni boy berishgandi. Mazkur uchrashuv oldidan namanganliklar yarim himoyachisi Sanjar Asqaralievning fikrlari bilan qiziqdik:

- Xabaringiz borki, oldingi turda Toshkentda “Paxtakor” mehmoni bo'lib, yirik hisobda imkoniyatni boy bergandik. Aslini olganda “Paxtakor”ga qarshi bahsni yomon tarzda o'tkazmadik. Faqat darvozamizga belgilangan penalti ijobiy natijaga bo'lgan umidimizni so'nishiga olib keldi. Endilikda ushbu mag'lubiyatni unutgan holda “Qo'qon-1912” jamoasiga qarshi o'yinga tayyorgarlik ko'rmoqdamiz. Maqsadimiz munosib tarzda shug'ullanib, g'alaba qozonish. Aynan shu orqali muxlislarimizni ham kayfiyatini ko'tarishni niyat qilganmiz. Ko'pchilikka yaxshi malumki, mamlakat kubogining nimchorak final dastlabki o'yinida “Qo'qon-1912” jamoasiga o'z maydonimizda imkoniyatni boy berib qo'ygandik. Ushbu mag'lubiyatni tasodif ekanligini amalda isbotlash uchun ham bor kuch va mahoratimizni ishga solamiz. Bo'lajak o'yinda yutuqqa erishib, Qo'qonda bo'lib o'tadigan javob uchrashuvi oldidan ruhiyatimizni ham ko'tarib olamiz degan umiddamiz", - deydi Asqaraliev.

"Navbahor" matbuot xizmati