Samvel Babayan: "Nima ham derdim, borimiz shu ekan"

- Bugun biz Rio olimpiyadasi yo'llanmasi uchun kurashayotgan jamoaga yutqazdik. Nima ham derdim, demak bugungi kunda bizning imkoniyatlarimiz, borimiz shu ekan. Afsuski hech narsa ko'rsata olmadik. Yakka-kurashlarni yutqazdik. Himoya chizig'idagi muammolarimiz bizga pand berdi. Bugungi o'yinda himoyadagi xatolarimiz bizga qimmatga tushdi. Jamoamizdagi himoya chizig'i ayni paytda eng og'riqli nuqtamiz deb bilaman. Biz asosan to'pni ko'proq bir-birimizga uzatib o'ynadik. Lekin bu kabi o'yinda himoya chizig'idagi hozirgi mavjud futbolchilarimiz yuqori saviyada o'ynashga qodir emaslar. Ularning mahorati bunga yo'l qo'ymaydi. Oxirgi golda himoyachimiz hakam xushtagigacha o'ynashi kerak edi. Qanot hakami bayroqchasini ko'targani uchun futbolchi to'xtab qoldi. Bu ham futbolchining saviyasidan dalolat. Top darajadagi futbolchi hech qachon bu xatoni qilmaydi. Jamshid Iskanderov bilan ham o'yinni yo'lga qo'ya olmadik va shu boisdan uni almashtirdik. Lekin shuni takidlash kerakki, biz ikkita o'yinda ham juda kuchli raqiblarga qarshi maydonga tushdik. Afsuski bu o'yinlarda o'zimiz istagandek harakat qila olmadik.